Համբուրգում աhաբեկչության գործով ձերբակալվել է 17-ամյա սիրիացի
Գերմանիայի Համբուրգի ոստիկանության հատուկ ստորաբաժանումը ձերբակալել է 17-ամյա սիրիացու, որը կասկածվում է ահաբեկչական հարձակում պլանավորելու մեջ, գրել են ԶԼՄ-ները՝ հղում անելով Համբուրգի գլխավոր դատախազությանը։
Քննիչների տվյալներով՝ ձերբակալվածը պլանավորել էր պայթյուն իրականացնել Համբուրգի առևտրի կենտրոնում, բարում կամ ոստիկանական բաժանմունքում և սպանել «անհայտ թվով մարդկանց», որոնց նա համարել է «անհավատ»։ Դատախազությունը հայտարարել է, որ նա առաջնորդվել է «Իսլամական պետություն» ահաբեկչական խմբավորման գաղափարախոսությամբ։
Դեռահասը ձերբակալվել է մայիսի 7-ին։ Գերմանիայի դաշնային հետախուզական ծառայությունը տեղեկություններ է ստացել նրա հավանական ծրագրերի մասին անցյալ շաբաթվա սկզբին։ Հանրային հեռարձակող NDR-ի տվյալներով՝ սիրիացին նախկինում ուշադրություն էր գրավել Telegram խմբերում գրառումների միջոցով։
Հարձակմանը նախապատրաստվելիս սիրիացին, ի թիվս այլ բաների, գնել է քիմիական նյութեր։ Պայթյունի այլընտրանքային տարբերակի համար նա մտածել է Մոլոտովի կոկտեյլներ օգտագործել որպես հրկիզող սարքեր, ինչպես նաև դանակով հարձակում։ Նրա տան խուզարկության ժամանակ քննիչները նաև հայտնաբերել են կրակի հեղուկ, դանակ ու բալակլավա։
Ձերբակալվածը արդեն հայտնի է եղել Գերմանիայի իրավապահ մարմիններին, քանի որ ներգրավված է եղել «Իսլամական պետության» խորհրդանիշների օգտագործման հետաքննության մեջ։ Առանձին հետաքննության շրջանակներում Համբուրգի դատախազությունը նշանակել է հոգեբուժական փորձաքննություն։
