Օսմանյան կայսրության հայերը կյանքից զրկվել են Առաջին համաշխարհային պшտերազմի դժվարին պայմաններում. Էրդողան
Այս տարի մենք հարգանքով հիշատակում ենք օսմանյան հայերին, ովքեր իրենց կյանքը կորցրեցին Առաջին համաշխարհային պատերազմի ծանր պայմաններում, և ես ևս մեկ անգամ իմ ցավակցությունն եմ հայտնում նրանց սերունդներին: Այս մասին նախագահ Թայիփ Էրդողանը ցավակցական ուղերձ է հղել Թուրքիայի Հայոց պատրիարքարանին և Թուրքիայի հայ համայնքին 1915 թվականի ապրիլի 24-ի 111-րդ տարելիցի կապակցությամբ, հաղորդում է Agos-ը:
Էրդողանի, ով 2012 թվականից ի վեր ամեն տարի ապրիլի 24-ին ցավակցական ուղերձ է հղում, այս տարվա ուղերձը հնչեցրել է Պատրիարքական փոխանորդ ավագ հայր Գրիգոր Տամատյանը՝ Ալթըմերմերի Սուրբ Հակոբ եկեղեցում մատուցված «Սուրբ Նահատակների հիշատակության կարգի» ժամանակ:
Նախագահ Էրդողանի ուղերձում ներառված էին հետևյալ հայտարարությունները.
«Թուրքիայի Հայոց Պատրիարք, Ամենապատիվ Տ. Սահակ Մաշալյան, Հայ համայնքի հարգելի անդամներ, Սիրելի քաղաքացիներ,
Ողջունում եմ ձեզ իմ անկեղծ զգացմունքներով և սիրով:
Այս տարի մենք հարգանքով հիշատակում ենք օսմանյան հայերին, ովքեր իրենց կյանքը կորցրեցին Առաջին համաշխարհային պատերազմի ծանր պայմաններում, և ես ևս մեկ անգամ իմ ցավակցությունն եմ հայտնում նրանց սերունդներին:
Օսմանյան կայսրության փլուզման ժամանակ նրանք, ովքեր կյանքից հեռացան օկուպացիայի, բախումների, ապստամբությունների, ավազակախմբերի գործունեության, ահաբեկչական գործողությունների և համաճարակների պատճառով, ինչպես նաև նրանք, ովքեր վտարվեցին իրենց հողերից Բալկաններում, Կովկասում և Արաբական թերակղզում, և օսմանյան բոլոր ժողովուրդները, որոնց տները ավերվեցին Անատոլիայի ամեն անկյունում, կրեցին խորը ցավ:
Դժբախտաբար, Օսմանյան կայսրության հայ քաղաքացիների թվում, ովքեր գոյություն են ունեցել և արժեքավոր ներդրում են ունեցել օսմանյան տիրապետության տակ գտնվող մարդկային կյանքի բոլոր ոլորտներում, եղել են նաև նրանք, ովքեր մեծապես տուժել են:
Մեզ հաջողվեց հիմնադրել Թուրքիայի Հանրապետությունը՝ չմոռանալով այս ցավերը, բայց իմանալով, թե ինչպես հաղթահարել դրանք:
Խաղաղության, ներդաշնակության և եղբայրության վրա հիմնված ավելի լավ օրերի հասնելու համար մենք աշխատում և ջանում ենք մեր բոլոր քաղաքացիների ու բարեկամների հետ միասին՝ անկախ նրանց էթնիկ կամ կրոնական ինքնությունից:
Մենք ձգտում ենք ապագա սերունդներին թողնել մի ժառանգություն, որտեղ ոչ թե վատ հիշողությունները, այլ ճշմարտությունն ենք կապում խղճի լեզվի հետ:
Մենք լավագույն պատասխանն ենք տալիս նրանց, ովքեր ցանկանում են պատմությունից թշնամանք սերմանել՝ որդեգրելով մի մոտեցում, որն առաջնահերթություն է տալիս խաղաղությանը, կարեկցանքին և երկխոսությանը, զերծ է գաղափարական շրջանակներից և հիմնված է հաշտեցման, այլ ոչ թե հակամարտության վրա:
Որպես 86 միլիոն մարդ՝ մենք միասին կկերտենք մեր ապագան և այն ժառանգությունը, որը կթողնենք մեր թոռներին:
Այս մտքերով ես վերահաստատում եմ իմ ընդհանուր վիշտը հայ համայնքի հետ՝ անցյալում նրանց կրած տառապանքների համար, և ևս մեկ անգամ հարգանքով հիշատակում եմ կյանքից հեռացած բոլոր օսմանյան քաղաքացիներին»:
