Իրանը հայտնել է փետրվարի 26-ին ԱՄՆ-ի հետ հնարավոր նոր բանակցությունների մասին
Իրանի արտաքին գործերի նախարար Աբաս Արաղչին հայտարարել է, որ դիվանագիտությունը իրանական միջուկային ծրագրի հետ կապված խնդիրների լուծման միակ ճանապարհն է, հայտնում է Mehr-ը։
Նա հավելել է, որ հավանաբար հինգշաբթի Ժնևում կհանդիպի ամերիկացի բանակցող Սթիվ Ուիթքոֆի հետ։
CBS News հեռուստաալիքին տված հարցազրույցում Արաղչին նշել է, որ իր գլխավորած իրանական բանակցային խումբն աշխատում է հնարավոր համաձայնագրի շրջանակային նախագծի պատրաստման վրա։
«Դեռևս դիվանագիտական լուծման լավ հնարավորություններ կան՝ հիմնված փոխշահավետ մոտեցման վրա»,- ընդգծել է նա։
Ի պատասխան հարցին, թե արդյոք իրանական կողմը երկու-երեք օրվա ընթացքում կներկայացնի առաջարկի նախագիծը, Արաղչին ասել է. «Դեռ աշխատում ենք դրա վրա... փորձում ենք այն այնպիսին դարձնել, որ ներառի երկու կողմերի շահերը հաշվի առնող տարրեր»։
«Երբ հանդիպենք՝ հավանաբար այս հինգշաբթի Ժնևում, կկարողանանք աշխատել այդ տարրերի վրա, պատրաստել լավ տեքստ և արագ համաձայնության գալ։ Դա լիովին հնարավոր եմ համարում»,- հավելել է Արաղչին։
Ըստ նրա, հնարավոր է կնքել ավելի շահավետ համաձայնագիր, քան 2015 թվականի Գործողությունների համապարփակ համատեղ ծրագիրն էր:
