Սիրիայում քրդերենը ճանաչվել է ազգային լեզու
Սիրիայի նախագահ Ահմեդ ալ-Շարաան հրամանագիր է ստորագրել՝ ուղղված Սիրիայում քրդական համայնքի իրավունքների պաշտպանությանը, այդ թվում՝ էթնիկ և լեզվական խտրականության բացառմանը։
«Արմենպրես»-ի հաղորդմամբ՝ այս մասին հաղորդում է Al Arabiya-ն։
Հրամանագիրը ստորագրվել է քրդական ուժերի և Դամասկոսի միջև վերսկսված բախումների ֆոնին։
X սոցիալական հարթակում հրապարակված տեսանյութում Սիրիայի նախագահը ուղերձով դիմել է քուրդ բնակչությանը՝ նշելով, որ հրամանագիրը, որը պետք է ամրագրվի օրենքի տեքստում, երաշխավորում է քրդերի՝ որպես իրավահավասար քաղաքացիների իրավունքները։ Նա նաև կոչ է արել տեղահանված սիրիացի քրդերին վերադառնալ իրենց քաղաքներն ու գյուղերը՝ ընդգծելով, որ դրա համար որևէ նախապայման չի լինի, բացի զենքը վայր դնելուց։
Ինչպես նշում է արաբական լրատվամիջոցը, հրամանագրի ամբողջական տեքստի համաձայն՝ քրդերենը Սիրիայում ճանաչվում է որպես ազգային լեզու, իսկ Նավրուզը հայտարարվում է ազգային տոն։
Բացի այդ, նախատեսվում է Սիրիայի քաղաքացիություն տրամադրել այն քրդերին, որոնք զրկվել էին դրանից 1962 թվականի վիճահարույց մարդահամարի արդյունքում։
Հրամանագրով նաև պետական հաստատություններին պարտավորեցվում է խթանել ներառական ազգային դիսկուրսը և ապահովել բոլոր համայնքների հավասար իրավունքները։
