Հոկտեմբերին ավելացել են Թուրքիայով Եվրոպա ռուսական «Գազպրոմի» մատակարարումները

Հոկտեմբերին «Գազպրոմի» կողմից «Թուրքական հոսք» գազատարի գծերից մեկով Եվրոպա մատակարարումներն ավելացել են։ Այդ մասին են վկայում Գազի փոխանցման համակարգերի օպերատորների եվրոպական ցանցի (ENTSOG) կայքում շաբաթ օրը՝ նոյեմբերի 1-ին հրապարակված բաց տվյալները, հաղորդել է «Немецкая волна»-ն։

Այս տեղեկատվության համաձայն՝ հոկտեմբերին թուրք-բուլղարական սահմանի «Ստրանջա 2/Մալքոչլար» կետով անցել է 17,403 ԳՎտ/ժ գազ։ Սա 8.7 տոկոսով ավելի է, քան սեպտեմբերին, եւ 13 տոկոսով ավելի, քան 2024թ․ հոկտեմբերին։

Տարվա սկզբից այս երթուղով մատակարարվել է ընդհանուր առմամբ 152,000 ԳՎտ/ժ գազ։ Սա 7.5 տոկոսով ավելի է, քան նախորդ տարվա նույն ժամանակահատվածում։

«Գազպրոմը» չի մեկնաբանել «Թուրքական հոսքի» միջոցով Եվրոպա մատակարարումների դինամիկան։

«Թուրքական հոսքի» եվրոպական գիծը միակ երթուղին է, որով «Գազպրոմի» խողովակաշարային գազը մատակարարվում է Եվրոպա՝ «Հյուսիսային հոսք» գազատարում տեղի ունեցած պայթյուններից հետո։ «Թուրքական հոսքը» դադարեցրել է ռուսական գազի տարանցումը Ուկրաինայի եւ Յամալ-Եվրոպա գազատարի միջով: «Կապույտ հոսք» գազատարը նույնպես կապում է Թուրքիան եւ Ռուսաստանը, բայց գազ է մատակարարում միայն Թուրքիայի ներքին շուկային։

«Թուրքական հոսքի» երկու գծերի տարեկան հզորությունը կազմում է 31.5 միլիարդ խորանարդ մետր գազ (յուրաքանչյուրը 15.75 միլիարդ խորանարդ մետր): Դրանցից մեկը վառելիք է մատակարարում թուրքական շուկային, մյուսը՝ Հարավային եւ Կենտրոնական Եվրոպայի երկրներին։

Ներկայում ԵՄ-ը նաեւ ռուսական հեղուկացված բնական գազ (ՀԲԳ) է ստանում Յամալի ՀԲԳ նախագծից: Սա համատեղ ձեռնարկություն է ռուսական «Նովատեկ» (50.1 տոկոս), ֆրանսիական «TotalEnergies» (20 տոկոս), Չինաստանի ազգային նավթային կորպորացիայի (20 տոկոս) եւ չինական «Մետաքսի ճանապարհ» հիմնադրամի (9.9 տոկոս) միջեւ։

Եվրամիությունը մտադիր է ամբողջությամբ հրաժարվել ռուսական գազից մինչեւ 2028թ․ հունվարի 1-ը: ՀԲԳ-ից փուլային հրաժարումը նախատեսվում է մինչեւ 2027թ․ հունվարի 1-ը։