Կոստա Ռիկայում հայտնաբերվել է ոսկեգույն շնաձուկ
Կոստա Ռիկայում ձկնորսները բռնել էին եզակի շնաձկան, որն ուներ սպիտակ աչքեր և ոսկեգույն մաշկ։ Այս մասին հրապարակել է National Geographic-ը։
Լուսանկարները սկզբում համարվեցին կեղծ, սակայն գիտնականները հաստատեցին, որ դրանք իրական են։ Շնաձկան գույնը պայմանավորված է հազվագյուտ գենետիկական համադրությամբ՝ ալբինիզմ և քսանտոխրոմիզմ, որոնք սովորաբար առանձին են հանդիպում։
Սա առաջին անգամն է, որ շնաձկան մոտ արձանագրվում են այս երկու առանձնահատկությունները միասին։ Նորությունը զարմացրել է մասնագետներին, որոնք ընդգծում են, որ սա ցույց է տալիս՝ անգամ լավ ուսումնասիրված տեսակների մեջ դեռ մեծ բազմազանություն կա։
Չնայած գունային այս տարբերությանը՝ շնաձուկը առողջ էր և հասուն, ինչը հուշում է, որ այն կարողացել է գոյատևել մթնոտ ջրերում, որտեղ գույնը մեծ դեր չի խաղում։ Գիտնականները գտնում են, որ սա լավ լուր է թե՛ տեսակների պահպանման, թե՛ Կոստա Ռիկայի համար, քանի որ կարող է նույնիսկ զբոսաշրջիկների հետաքրքրությունը մեծացնել։
Այս եզակի հայտնագործությունը ևս մեկ անգամ ցույց է տալիս, որ օվկիանոսը դեռ լի է անակնկալներով։
