Այս շաբաթ տեղի կունենա «մոլորակների մեծ շքերթը». հաջորդ անգամ հազվագյուտ երևույթը տեղի կունենա 2040-ին
Այս շաբաթ տեղի կունենա ամենաուշագրավ բնական երևույթներից մեկը՝ «մոլորակների մեծ շքերթը». 7 մոլորակները՝ Մարսը, Յուպիտերը, Ուրանը, Վեներան, Նեպտունը, Մերկուրին և Սատուրնը, միաժամանակ տեսանելի կլինեն գիշերային երկնակամարում: Հաջորդ անգամ այս հազվագյուտ ֆենոմենը տեղի կունենա 2040-ին, գրում է BBC-ն:
Ըստ աղբյուրի՝ «մոլորակների մեծ շքերթը» հնարավոր կլինի տեսնել երեքշաբթի, չորեքշաբթի և հինգշաբթի՝ մայրամուտից անմիջապես հետո: Մոլորակներից 4-ը՝ Մերկուրին, Վեներան, Յուպիտերն ու Մարսը, տեսանելի կլինեն անզեն աչքով: Մինչդեռ Սատուրնը, Ուրանն ու Նեպտունը տեսնելու համար կպահանջվի աստղադիտակ:
«Մոլորակների մեծ շքերթը» գեղեցիկ դիտողական երևույթ է, որը տեղի է ունենում, երբ մի քանի մոլորակներ միաժամանակ դասավորվում են Արեգակի մի կողմում։
