Շոլցը Փարիզի «արտակարգ գագաթնաժողովից» հետո հայտարարություն է արել. Ուկրաինայի հարցն էր քննարկվում
Գերմանիան կշարունակի աջակցել Ուկրաինային ռուսական ագրեսիայից պաշտպանվելու գործում։ Միաժամանակ «դեռ վաղ է» խոսել խաղաղապահներ ուղարկելու մասին։ Դրա մասին հայտարարել է Գերմանիայի կանցլեր Օլաֆ Շոլցը, գրում է Le Monde պարբերականը։
Գերմանիայի կառավարության ղեկավարը մի քանի մեկնաբանություն է տվել լրագրողներին այն բանից հետո, երբ մասնակցել է Փարիզում Ուկրաինայի հարցով «արտակարգ գագաթնաժողովին»։
«Մենք կշարունակենք աջակցել Ուկրաինային, և Ուկրաինան կարող է վստահել մեզ»,- ընդգծել է կանցլերը։
Շոլցը նշել է նաև, որ դեմ է Ուկրաինային «խաղաղության գործարք» պարտադրելուն։ Երկիրը չի կարող «ընդունել այն ամենը, ինչ իրեն ներկայացվում է»։
Միևնույն ժամանակ, ըստ կանցլերի, իրեն արդեն «մի փոքր նյարդայնացրել է» Ուկրաինա եվրոպացի խաղաղապահներ հնարավոր ուղարկման թեման՝ այն «խիստ անհարկի» համարելով:
«Մենք խոսում ենք Ուկրաինայի թիկունքում՝ գոյություն չունեցող համաձայնագրի հիման վրա»,- հավելել է Շոլցը։
Գերմանիայի կառավարության ղեկավարի կարծիքով «խաղաղության ժամանակը դեռ չի եկել», և Ուկրաինան դեռ «դաժան պատերազմի հորձանուտում է»։
Նա միաժամանակ ընդգծել է, որ պատասխանատվությունը չի կարելի կիսել Եվրոպայի եւ ԱՄՆ-ի միջև: Կանցլերի համոզմամբ՝ ելնելով հավաքական անվտանգության շահերից՝ Արևմուտքը պետք է համատեղ գործի։
