Թուրքամետ ուժերը հայտնել են Սիրիայի Մանբիջ քաղաքի վերահսկողությունը վերցնելու մասին, քրդերը հերքում են այդ տեղեկությունը

Թուրքիայի աջակցությունը վայելող սիրիացի ապստամբները մտել են Սիրիայի հյուսիսային Մանբիջ քաղաք՝ ԱՄՆ դաշնակից քրդական ուժերից իրենց վերահսկողության տակ վերցնելով շրջակա տարածքի մեծ մասը, հայտնում է Reuters-ը՝ վկայակոչելով թուրքական անվտանգության ծառայության աղբյուրին։

«PKK-ի (Քրդստանի աշխատավորական կուսակցության - խմբ.) դեմ պայքարը շատ մոտ է հաղթանակին։ Թե՛ օդային, թե՛ ցամաքային գործողությունները շարունակվում են Մանբիջը PKK-ի ձեռքից վերցնելու համար»,- ասել է աղբյուրը՝ նկատի ունենալով քրդական աշխարհազորայիններին, որոնք արդեն երկար ժամանակ վերահսկում են Մանբիջը:

Աղբյուրը նշում է, որ Թուրքիայի կողմից աջակցվող ուժերը վերահսկում են Մանբիջի 80%-ը, որը զբաղեցնում է մոտ մի քանի հարյուր քառակուսի կիլոմետր տարածք և մտել են հենց քաղաք։

Սակայն, ԱՄՆ-ի աջակցությունը վայելող սիրիական քրդական ուժերը, որոնք վերահսկում են Սիրիայի հյուսիս-արևելքը և նախկինում եղել են թուրքական մի քանի ներխուժումների թիրախ, ասել են, որ դեռևս պայքարում են թուրքամետ խմբավորումների դեմ:

«Մեր ուժերը շարունակում են իրականացնել Մանբիջը պաշտպանելու իրենց առաքելությունը՝ օգտագործելով համապատասխան ռազմական մեթոդներ...Մանբիջի և Ալ-Բաբայի ռազմական խորհուրդների մարտիկներն ակտիվորեն դիմադրում են Մանբիջ քաղաքի և նրա շրջակայքի վրա թուրքական վարձկան զավթիչների հարձակումներին: Այս բախումների ընթացքում տասնյակ վարձկաններ են սպանվել ու վիրավորվել։

Իրենց ձախողումները քողարկելու համար վարձկանների հետ կապված լրատվամիջոցները հայտարարել են, որ վերահսկում են Մանբիջի մեծ մասը: Այս տեղեկությունը կեղծ է, և մեր ուժերը շարունակում են իրենց ջանքերը՝ տարբեր ռազմական միջոցներով պաշտպանելու այս տարածքը և նրա բնակչությանը։ Անհաջող հարձակումներից հետո թուրք զավթիչները դիմել են քաղաքի օդային ռմբակոծմանը՝ թիրախավորելով քաղաքացիական ենթակառուցվածքները և վարչական շենքերը»,- ասվում է քրդական ուժերի հայտարարության մեջ։

Մանբիջ քաղաքը գտնվում է Թուրքիայի սահմանից մոտավորապես 30 կմ հարավ և Եփրատ գետից արևմուտք։