Մուսուլմանների՝ դեպի Մեքքա այս տարվա ուխտագնացության ժամանակ զոհվածների թիվը հասել է 1,301-ի

Սաուդյան Արաբիայի առողջապահության նախարար Ֆահդ բեն Աբդել Ռահման ալ-Ջալաջելը հայտնել է, որ մուսուլմանների՝ դեպի Մեքքա ուխտագնացության (հաջ) ժամանակ մահացած հավատացյալների թիվը 1,000-ից հասել է 1,301-ի։ Այս մասին գրում է kommersant.ru-ն:

Նրանց 83%-ը համապատասխան վիզա չի ունեցել, ուստի ստիպված է եղել երկար ճանապարհներ անցնել առանց արևից պատսպարվելու, ինչն էլ հանգեցրել է հյուծվածության և մահվան: Մահացածները թաղվել են Մեքքայում։

Մահացածների ինքնությունը պարզելու գործընթացը ձգձգվել է, քանի որ շատերն իրենց հետ փաստաթղթեր չեն ունեցել։

Մահացածների թվում եղել է 660 եգիպտոսցի։ Նրանցից միայն 31-ն ուներ Սաուդյան Արաբիայում գտնվելու իրավունք։ Եգիպտոսը չեղյալ է հայտարարել 16 տուրիստական գործակալությունների լիցենզիաները, որոնք օգնել են ուխտավորներին առանց թույլտվության մեկնել Սաուդյան Արաբիա։

Զոհվածների թվում եղել է 165 մարդ Ինդոնեզիայից, 98-ը՝ Հնդկաստանից և տասնյակները՝ Հորդանանից, Թունիսից, Մարոկկոյից, Ալժիրից, Մալայզիայից, ըստ Associated Press-ի:

Շատ դեպքերում մահը տեղի է ունեցել ֆիզիկական ուժասպառության և ջրազրկման հետևանքով, ինչն իր հերթին պայմանավորված է եղել ծայրահեղ շոգով: Նշվում է, որ հաջի օրերին Սուդյան Արաբիայում ցերեկը ջերմաստիճանը տատանվել է +46°C-ից +49°C-ի սահմանում։

Հաջը մուսուլմանների  ամենամյա ուխտագնացություն է դեպի Մեքքա: Սաուդյան Արաբիայում այն սկսվել է հունիսի 14-ին և շարունակվել մինչև հունիսի 19-ը։ Հաջին այս տարի մասնակցել է 1,8 մլն մարդ։