Ուկրաինայի հետախուզությունն անմիջական կապ ունի «Կրոկուսի» ահաբեկչության հետ. Բորտնիկով
Ուկրաինայի ռազմական հետախուզությունն անմիջական կապ ունի մերձմոսկովյան «Կրոկուս սիթի հոլում» տեղի ունեցած ահաբեկչության հետ։
Հայտարարել է Ռուսաստանի ԱԴԾ տնօրեն Ալեքսանդր Բորտնիկովը:
«Հետաքննությունը շարունակվում է, բայց արդեն կարելի է վստահաբար ասել, որ այդ հարձակման հետ անմիջական կապ ունի Ուկրաինայի ռազմական հետախուզությունը», - ասել է Բորտնիկովը Բիշքեկում ԱՊՀ մասնակից պետությունների անվտանգության մարմինների և հատուկ ծառայությունների ղեկավարների խորհրդի նիստում:
ՌԴ ԱԴԾ տնօրենն ընդգծել է, որ ահաբեկչության բոլոր հանգամանքները կպարզվեն, կպատժվեն բոլոր մասնակիցները:
Հիշեցնենք, որ մարտի 22-ին Մոսկվայի շրջանի «Կրոկուս Սիթի Հոլ»-ում համերգից առաջ հրաձգություն էր եղել, այնուհետև հրդեհ էր բռնկվել:
ՌԴ քննչական կոմիտեի վերջին տվյալներով՝ ահաբեկչության զոհ է դարձել 144 մարդ, ՌԴ արտակարգ իրավիճակների նախարարության տվյալներով՝ տուժել է ավելի քան 150 մարդ:
