Խախտումների գծով առաջատարը Փարաքարն է. «Փաստ»
«Փաստ» օրաթերթը գրում է.
Որքան շատ են իշխանությունները համակարգային կոռուպցիայի վերացման մասին խոսում, այնքան հաճախակի են նման դրսևորումները ջրի երես դուրս գալիս: Ընդ որում, ոչ միայն լրատվամիջոցներում: Նույնիսկ համապատասխան մարմինների ստուգումներն են ի հայտ բերում ահռելի խնդիրներ: Եվ սա, կրկնենք, զուտ պաշտոնական բացահայտումներն են: Դժվար չէ պատկերացնել, թե գլոբալ առումով ինչ է կատարվում:
Ի մասնավորի, մի քանի օր առաջ տեղեկություն հրապարակվեց, որ ենթակառուցվածքների զարգացման նպատակով սուբվենցիոն ծրագրերի մասով ֆինանսների նախարարության կողմից ստուգումներ են իրականացվել Արմավիրի մարզի 5 համայնքում, և միայն Բաղրամյանի համայնքապետարանին հատկացված գումարների ծախսման ճշտության ստուգման արդյունքներով խախտումներ չեն հայտնաբերվել: Արաքս, Խոյ, Մեծամոր և Փարաքար համայնքներում իրականացված շինարարական ծրագրերում արձանագրվել են ֆինանսական խախտումներ՝ պետական ու համայնքային բյուջեներին հասցնելով շուրջ 56, 5 մլն դրամի վնաս, ինչից վերականգնման է ենթակա մոտ 28 մլն դրամը:
Ուշագրավ է, որ գումարային տեսանկյունից ամենախոշոր խախտումներն արձանագրվել են Փարաքարի համայնքապետարանում: Ստուգման ենթարկված 4 սուբվենցիոն ծրագրերի գծով արձանագրվել են շուրջ 37 մլն դրամի խախտումներ, որը փաստացի կազմում է նշյալ համայնքներում հայտնաբերված խախտումների մոտ 65 տոկոսը: Մեծամորում ստուգման ենթարկված 6 ծրագրի գծով արձանագրվել են մոտ 11 մլն դրամի խախտումներ, Արաքսի համայնքապետարանում՝ 4 ծրագրի գծով մոտ 7 մլն դրամի, Խոյի համայնքապետարանում՝ 1,6 մլն դրամի խախտումներ:
Մանրամասները՝ «Փաստ» օրաթերթի այսօրվա համարում
