Իրանում նոր աշխարհակարգի ստեղծումն անվանել են իրենց արտաքին քաղաքականության նպատակը
Իրանի արտաքին քաղաքականության նպատակներից մեկը նոր աշխարհակարգի ստեղծումն է՝ հիմնված միջազգային հարաբերությունների բոլոր սուբյեկտների իրավահավասարության սկզբունքի վրա։ Այս մասին հայտարարել է Իրանի առաջին փոխնախագահ Մոհամադ Մոհբերը Շանհայի համագործակցության կազմակերպության (ՇՀԿ) անդամ պետությունների կառավարությունների ղեկավարների խորհրդի ընդլայնված կազմով նիստում։
«Մենք նոր աշխարհակարգի ձեւավորման եւ միաբեւեռ աշխարհից բազմաբեւեռի անցման վկաներն ենք։ Նոր աշխարհակարգը կհենվի այն սկզբունքի վրա, որի համաձայն՝ բոլոր անկախ գործող կողմերը պետք է հավասար մասնակցություն ունենան միջազգային հարաբերություններում։ Իրանի Իսլամական Հանրապետությունն իր արտաքին քաղաքականությունում ձգտում է իր ավանդն ունենալ նոր եւ արդարացի աշխարհակարգի ձեւավորման գործում»,- ասել է նա։
Նիստին մասնակցում են նաեւ Ռուսաստանի վարչապետ Միխայիլ Միշուստինը, Ղազախստանի, Չինաստանի, Տաջիկստանի եւ Ուզբեկստանի կառավարությունների ղեկավարները, ինչպես նաեւ Հնդկաստանի եւ Պակիստանի արտաքին գործերի նախարարները։ Հանդիպմանը ներկա են բոլոր ութ մասնակից երկրների ներկայացուցիչները։
Նիստին հրավիրված են նաեւ Բելառուսի եւ Մոնղոլիայի վարչապետերը, որոնք հանդես են գալիս դիտորդ պետությունների դերում, Թուրքմենստանի բարձր ներկայացուցիչը՝ որպես նախագահող կողմի հյուր, մի շարք գործընկեր միջազգային կազմակերպությունների գործադիր մարմինների ղեկավարներ։
