Մեկ տարի անց. ինչ նորություն կա Պեմզաշենի դաժան սպանության գործով
Պեմզաշենի սպանության գործով մեղադրական եզրակացությունը մինչև երկուշաբթի կպատրաստվի, մինչև ամսվա վերջ էլ գործը կմտնի դատարան։ Այս մասին այսօր MediaHub-ի հետ զրույցում ասաց Պեմզաշենի ընտանիքի սպանության գործով տուժողների իրավահաջորդի շահերի պաշտպան Գարիկ Գալիկյանը։
«Նախաքննությունն ավարտվել է, երկուշաբթի նյութերն ինձ կուղարկեն»,- ասաց նա։
Պեմզաշենում 2022 թվականի նոյեմբերի 9-ին տեղի ունեցած դաժան սպանությունների գործով մեղադրյալ Վրույր Բարսեղյանի պաշտպան Էդուարդ Աղաջանյանն էլ MediaHub-ին փոխանցեց, որ հիմա գործի նյութերի ծանոթացման գործընթացի մեջ են։
Հիշեցնենք, որ Շիրակի մարզի Պեմզաշեն համայնքում նախորդ տարի նոյեմբերի 9-ին 31-ամյա Զարինե Մելիքսեթյանի և նրա երկու անչափահաս երեխաների դաժան սպանությունների մեջ մեղադրվող ազգականներ Արկադի և Վրույր Բարսեղյանները կալանավորված են։
Սպանության կասկածանքով նոյեմբերի 12-ին ձերբակալվել էր Շիրակի մարզի 32-ամյա բնակիչ Վրույր Բարսեղյանը, որը ոստիկանությունում ինքնախոստովանական ցուցմունք էր տվել՝ նշելով, որ սպանության օրն իր հետ է եղել նաև իր ազգական 36-ամյա Արկադի Բարսեղյանը։
Վերջինս իր մեղավորությունը չի ընդունում:
Լիաննա Թորոսյան
