Արամ Գասպարյանի առողջական վիճակն ուղղակի անհամատեղելի է կալանքի հետ. Ելենա Կիրակոսյան
Ելենա Կիրակոսյանը ֆեյսբուքյան իր էջում գրել է.
Արևմուտքն, իհարկե, իր քաղաքական շահից ելնելով, կարող է ամեն օր ողջունել արդարադատության ոլորոտի բարեփոխումներում Հայաստանի գրանցած «առաջընթացը», սակայն դրանից իրականությունը չի փոխվում:
Դատարաններն այսօր առավել քան երբևէ աշխատում են ոչ թե օրենքի տառով, այլ կամայականության սկզբունքով, իսկ մի խումբ դատավորներ ուղղակիորեն զբաղված են քաղաքական պատվերներ կատարելով:
Երեկ դատարանը որոշեց չփոխել Արամ Գասպարյանի խափանման միջոցը՝ չնայած առկա օբյեկտիվ հիմքերին: Մի կողմ, որ Արամ Գասպարյանի գործը շինծու է և կալանավորումն ունի ոչ թե իրավական, այլ քաղաքական հիմքեր, ծանր վիրահատություն տարած Արամ Գասպարյանի առողջական վիճակն ուղղակի անհամատեղելի է կալանքի հետ:
Սա առաջին դեպքը չի, երբ դատարանը հաշվի չի առնում կալանավորվածի առողջական վիճակը: Եթե Արմեն Գրիգորյանի դեպքից հետո որոշ դատավորներ, այնուամենայնիվ, որոշեցին քաղաքական պատվեր կատարելուց չհատել կարմիր գծեր, դատավոր Ֆրախոյանը շարունակում է մնալ անդրդվելի: Երևի այս քաղաքական պատվերը կատարելու համար ստացած գինը բավականին մեծ է:
