Բաքուն պնդում է, որ Կապույտ մզկիթը «ոչ իրանական» է, իսկ Երևանը՝ «ադրբեջանական»

Eadaily.com-ը գրում է, որ Կապույտ մզկիթը այսօր Երևանում պահպանված միակ մզկիթն է։ Այն քաղաքի Կոնդի թաղամասում է։ Այդ մասին հայտարարել է «Թեփեբաշի թաղամասի ճակատագիրը, Երևանում Ադրբեջանի ազգային-մշակութային և պատմական ժառանգության վերջին մնացորդը, Հայաստանում ադրբեջանական ժողովրդի ժառանգության պատմական հետքերի ջնջումը» հետազոտության հեղինակ, պատմաբան Սաբուխի Հուսեյնովը: Նա հիշեցրել է, որ Կապույտ մզկիթը կառուցել է Հուսեյնալի խանը։

«Վերջին գիտական ​​ուսումնասիրություններում հիշատակումներ կան այն մասին, որ Հուսեյնալի Խանը թաղվել է Կապույտ մզկիթում: Կապույտ մզկիթի բակում գտնվող քարի վրա փորագրված 1790 թվականի արձանագրությունը վերաբերում է խանի ընտանիքի կանանցից մեկին։ Կապույտ մզկիթի հետ կապված բոլոր փաստաթղթերը գտնվում են ադրբեջանական արխիվում։ Անընդունելի է, որ Իրանի ներկայացուցիչները Կապույտ մզկիթն անվանում են իրանական մզկիթ։ Այդ մասին բավականին շատ փաստաթղթեր կան։ Կապույտ մզկիթը պետք է աշխարհում ճանաչվի որպես ադրբեջանական մզկիթ: 1917 թվականին Երևանում ապրում էր ընդամենը մոտ 100 պարսիկ։ 1831-1920 թվականներին Երևանի բնակչության մեծամասնությունը կազմում էին ադրբեջանցիները։ Այսօր էլ աշխարհահռչակ հետազոտողները ծիծաղում են այն փաստի վրա, որ Կապույտ մզկիթը կոչվում է իրանական մզկիթ։ Մզկիթը 100 հոգու համար չէր կառուցվի, պետք է դադարեցվի Կապույտ մզկիթը իրանական մզկիթ անվանելը»,- պնդել է ադրբեջանցի պատմաբանը։

Երևանի Կապույտ մզկիթը իրանական արվեստի խորհրդանիշ է։ Փետրվարի 23-ին դա մատնանշել է ՀՀ-ում Իրանի դեսպանատունը՝ կցելով մզկիթի պատկերը։ Դրանով Իսլամական Հանրապետության դիվանագետներն արձագանքել են ադրբեջանցի պատգամավորի բավականին սադրիչ հայտարարությանը, ով ավելի վաղ այցով եղել էր Հայաստանի մայրաքաղաքում Եվրանեսթի խորհրդարանական վեհաժողովի նիստին մասնակցելու նպատակով և այցելել Կապույտ մզկիթ։

Հիշեցնենք, որ Ադրբեջանի նախագահ Իլհամ Ալիևը, անցյալ տարվա օգոստոսին գտնվելով Քալբաջար քաղաքում, որը Ղարաբաղի պատերազմից հետո 2020 թվականի աշնանը անցել է Բաքվի վերահսկողության տակ, կոչ էր արել «ռեպորտաժներում և ընդհանրապես բառապաշարում օգտագործել ոչ թե Վարդենիս, այլ Բասարգեչեր անունը»։ Անցյալ տարվա 44-օրյա պատերազմից էլ շատ առաջ Ադրբեջանի ղեկավարը մեկ անգամ չէ, որ ձեռնարկել է պատմական էքսկուրսիաներ, մասնավորապես՝ պնդելով ադրբեջանցիների իրավունքները «Իրևանի» նկատմամբ և Հայաստանի մայրաքաղաքն անվանել «իրենց պատմական քաղաքը»։

Նյութը հրապարակման պատրաստեց Կամո Խաչիկյանը