ՌԴ պաշտպանության նախարարությունը հաղորդագրություն տարածեց
Ռուս խաղաղապահները Լեռնային Ղարաբաղի դիտակետերում արտակարգ իրավիճակների թվի աճի պատճառով տագնապի հայտարարման դեպքում գործողություններ են մշակել: Այս մասին լրագրողներին հայտնել են ՌԴ Պաշտպանության նախարարությունում։
«Քանի որ վերջին ժամանակներս հաճախակի են դարձել կողմերի սահմանազատման գծի երկայնքով արտակարգ իրավիճակների առաջացման դեպքերը, ռուսական խաղաղապահ զորակազմի զինծառայողները վարժանքներ են անցկացնում ժամանակակից սպառազինության և ռազմական տեխնիկայի օգտագործմամբ: Նաև խաղաղապահների կողմից մշակվում են դիրքի վրա պայմանական հարձակումը հետ մղելու տարբեր տարբերակներ»,- ասել է ռուսական խաղաղապահ զորակազմի ներկայացուցիչ Միխայիլ Եժովը։
Ինչպես հայտնել են ռազմական գերատեսչությունում, ռուս խաղաղապահները Լեռնային Ղարաբաղում դիտորդական դիրքերում ծառայության անցկացման ժամանակ կանոնավոր մարզումներ են անցկացնում:
««Տագնապի» գործողությունների մարզման ժամանակ խաղաղապահ զորակազմի զինծառայողները մշակում են հրաձգային դիրքերում տեղ գրավելը՝ դիրքերի պաշտպանության նպատակով, ինչպես նաև մայրուղին փակելու համար շարժումը դադարեցնելու նպատակով»,- պարզաբանել են նախարարությունում:
ՌԴ ՊՆ-ում պատմել են, որ վարժանքի ժամանակ ազդանշանը ստանալուց հետո խաղաղապահները հնարավորինս կարճ ժամանակում պաշտպանության են անցել նախապես սարքավորված դիրքերում: «Դիրքի պաշտպանությունն ուժեղացնելու համար գործի են դրվել հերթապահ ստորաբաժանումները БТР-82А զրահամեքենաներով»,-նշել են ռազմական գերատեսչությունում:
Ընդգծել են նաև, որ ռուսական խաղաղապահ զորակազմի բոլոր դիտակետերը համալրված են «Բլոկպոստ» ամրաշինական կառույցներով, որոնք նախատեսված են զինծառայողներին հրաձգային զենքից և բեկորներից պաշտպանելու, ինչպես նաև մոտակա տարածքի շրջանաձև հսկողություն իրականացնելու համար:
