Ալիևը հայտարարել է, որ Հայաստանից պատասխան չեն ստացել
Ադրբեջանը հետկոնֆլիկտային փուլում հանդես է եկել Հայաստանի հետ հարաբերությունների կարգավորման մի շարք առաջարկություններով, սակայն մինչ օրս Երևանից պատասխան չի ստացել։ Այս մասին հայտարարել է Ադրբեջանի նախագահ Իլհամ Ալիևը Բաքվում ընթացող «Աշխարհը COVID-19-ից հետո» ֆորումի ժամանակ ունեցած ելույթում, փոխանցում են տեղական լրատվամիջոցները։ «Ադրբեջանը Հայաստանին մի շարք առաջարկներ է ներկայացրել՝ սկսել խաղաղության պայմանագրի ուղղությամբ աշխատանքը, քանի որ մենք մտադիր ենք խոսել խաղաղության, ոչ թե պատերազմի մասին։ Սակայն, ցավոք, այդ առաջարկը դեռ անպատասխան է մնացել»,- ասել է Ալիևը։ Նա կրկին հնչեցրել է ադրբեջանական թեզը, որ Լեռնային Ղարաբաղի հակամարտությունը լուծված է։
Ըստ Ալիևի՝ Ադրեջանն առաջարկել է Հայաստանի հետ սահմանի դեմարկացիա և դելիմիտացիա սկսել, որպեսզի ապահովվի երկու երկրների տարածքային ամբողջականությունը։ «Այդ ամենը համապատասխանում է միջազգային նորմերին, սակայն այդ հարցը դեռ լուծում չի գտել»,- հայտարարել է Ադրբեջանի նախագահը։ Նա նաև նշել է, որ Ադրբեջանը, իբր, Հայաստանի հետ հարաբերությունների կարգավորման հարցում «առավելագույնս կառուցողական է, և իրավիճակի հետագա զարգացումը կախված է Հայաստանի դիրքորոշումից»։ «Մեր դիրքորոշումը միանշանակ պարզ է։ Մենք պատրաստ ենք խաղաղ բանակցություններ սկսել և խաղաղության պայմանագիր ստորագրել։ Մենք ցանկանում ենք այդ էջը փակել ու սահմանները որոշել, սակայն, ինչպես տեսնում եք, Հայաստանից պատասխան չկա։ Կարելի է ասել, որ մի ամբողջ տարի նրանք լռություն են պահպանում։ Կարծում եմ՝ նրանք չեն կարող դիմադրել Ադրբեջանի կառուցողական դիրքորոշմանը»,- ասել է Ադրբեջանի նախագահը։
Նշենք, որ Հայաստանի բազմիցս է հայտարարել սահմանների դելիմիտացիայի ու դեմարկացիայի իրականացման անհրաժեշտության մասին, այդ թվում՝ ՀՀ սուվերեն տարածքից ադրբեջանական զորքերի դուրսբերման, որին Ադրբեջանը որևէ կերպ չի արձագանքում։
