Հոկտեմբերի 19-ին Փաշինյանն ասել է` պատերազմը կանգնեցնելու գինը 5+2 շրջան հանձնելն է. Իշխան Սաղաթելյան
ՀՅԴ ԳՄ ներկայացուցիչ, ԱԺ փոխնախագահ Իշխան Սաղաթելյանը հայտարարել է, որ պատերազմի օրերին Փաշինյանի հետ հանդիպել է չորս անգամ որից 2-ը` դաշնակցության ներկայացուցիչներով, մյուս 2-ը` արտախորհրդարանական ուժերի հետ: Ֆեյսբուքյան իր էջում հրապարակված տեսանյութում Ի. Սաղաթելյանն այսօր մանրամասներ է հրապարակել հանդիպումների մասին:
«Առաջին հանդիպումը տեղի է ունեցել հոկտեմբերի 1-ին, երկրորդը` հոկտեմբերի 6-8-ն ընկած հատվածում: Առաջին հանդիպմանը մասնակցել եմ ես, Հրանտ Մարգարյանը եւ Արմեն Ռուստամյանը, իսկ երկրորդ հանդիպմանը մասնակցել ենք ես, Դաշնակցության բյուրոյի ներկայացուցիչ Հակոբ Տեր- Խաչատրյանը եւ Արմեն Ռուստամյանը: Այդ հանդիպումները տեղի են ունեցել կառավարությունում մեր եւ Նիկոլ Փաշինյանի միջեւ»,-պատմել է նա` նշելով, որ հանդիպումների գլխավոր նպատակն էր, որ իրենց առաջարկություններով, խորհուրդներով, իրավիճակի գնահատման իրենց տեսակետներով համադրեն իրենց անելիքները պետության հետ:
Ըստ Սաղաթելյանի`առաջին հանդիպման ժամանակ կարեւորել են թիկունքի` ժողովրդի համախմբվածությունը, ասել, որ այն շատ կարեւոր է հաղթանակի համար:
Անդրադառնալով հոկտեմբերի 12-ին արտախորհրդարանական ուժերի հետ հանդիպմանը` Սաղաթելյանը պատմել է, որ Փաշինյանը ներկայացրել է, որ ունենք կորուստներ, կորցրել ենք Թալիշը, Մատաղիսը եւ մարտեր են ընթանում Հադրութի մոտակայքում:
«Ես իրեն ընդհատեցի եւ ասեցի, որ Հադրութը հանձնված է, նա ինձ հակաճառեց, թե որտեղից այդ տեղեկությունը, ես ասել եմ, որ այդ տեղեկությունը հստակ է: Մոտ կես ժամ անց նրան ինչ-որ զեկույց բերեցին ու նա կարդաց, որ իբր Հադրութում մարտեր են ընթանում: Այդ հանդիպման ժամանակ ես ասել եմ, որ եթե հաղթենք, բոլոր դափնիները քոնն են, բայց եթե պարտվենք միակ մեղավորը դու ես: Նաեւ այդ հանդիպամն ժամանակ բարձրաձայնվել է զոհերի իրական թիվը, որը տարբեր էր հայտարարված թվից»,- նշել է Սաղաթելյանը:
Հոկտեմբերի 16-ին ՀՅԴ ԳՄ ներկայացուցիչ Իշխան Սաղաթելյանը ընդդիմադիր ուժերի հետ հանդիպում է հրավիրել, որի ժամանակ որոշվել է ստեղծել ռազմաքաղաքական հարցերի օպերատիվ շտաբ, որի մեջ պետք է ներգրավվեն Արցախի նախագահները, ՀՀ նախկին նախագահները, արտաքին գործերի նախարարները, պաշտպանության նախարարները, Գլխավոր շտաբի նախկին պետերը` նպատակ ունենալով բեկում մտցնել ե΄ւ ռազմի դաշտում, ե΄ւ արտաքին քաղաքականության մեջ:
«Ի պատիվ այս մարդկանց, բոլորը համաձայնվեցին, որ ստեղծվի այդ մարմինը եւ մտնեն պատասխանատվության տակ: Այսինքն բոլոր պատրաստ էին կանգնել Փաշինյանի կողքին, այլ ոչ թե երկիրը վերցնել նրա ձեռքից, սակայն այս առաջարկը մերժվեց Փաշինյանի կողմից, քանի որ մենք կռվում էինք պարտվելու համար, ոչ թե հաղթելու համար»,- ասաց Իշխան Սաղաթելյանը:
Նիկոլ Փաշինյանի հետ արտախորհրդարանակն ուժերի հաջորդ հանդիպումը տեղի է ունեցել հոկտեմբերի 19-ին, որի ժամանակ Փաշինյանը ասել է. «Ես ունեմ առաջարկ պատերազմը կանգնեցնելու եւ դրա գինը հետեւյալն է` 5+2 շրջան հանձնելով հնարավոր է պատերազմը կանգնեցնել, ու շարունակեց, որ այլ ելք չկա, հնարավոր չէ ռազմաճակատում բեկում մտցնել, ես հարցրեցի` գոնե կարգաիճակի հարց կա, ինքը ասաց, որ չէ, չկա: Ես ասել եմ, որ դու փասատորեն 23 օր հաղթելու եմ ասելուց հետո գնում ես ստորագրես կապիտուլյացիայի փաստաթուղթ եւ երկրը կանգնեցրել ես աղետի առաջ»:
Մանրամասները` տեսանյութում
