Բանակում անհասկանալի հանգամանքներում կորուստների ցուցանիշի աճը մտահոգիչ է և վախեցնող. Հրանտ Մելիք–Շահնազարյան
Հրանտ Մելիք–Շահնազարյանը ֆեյսբուքյան գրառմամբ անդրադարձել է բանակում խաղաղ պայմաններում մահվան դեպքերին՝ նշելով, որ 2020-ին գրանցված ցուցանիշը մտահոգիչ է և վախեցնող։ Գրառման մեջ ասվում է.
«2020 թվականի առաջին 1.5 ամսում Հայոց բանակում 12 զինվոր է զոհվել՝ բոլորը անհասկանալի հանգամանքներում: Զինվորներից 6-ը զոհվել են հունվար ամսին, մյուս 6-ը՝ փետրվարի առաջին տասնօրյակում: Դժբախտ դեպքեր միշտ էլ եղել են, բայց այս ցուցանիշի աճն իրոք մտահոգիչ ու վախեցնող է:
Մի կարևոր փաստ էլ եմ ուզում արձանագրել. բանակում տեղի ունեցող այս ողբերգությունների մասին իրականությանը վարդագույն ակնոցներով նայող Նիկոլ Փաշինյանն ու իշխանության մյուս ներկայացուցիչներն այս ընթացքում ոչ մի ծպտուն չեն հանել, անգամ ընտանիքներին ցավակցության հրապարակային խոսք չեն ուղղել: Փոխարենը երկրի վարչապետի էջում ամեն օր անհեթեթ լուրեր են աննախադեպ աճերի մասին:
Ժամանակին, երբ բանակի խնդիրները միայն «մայկա-տռուսիկով» ու ճաշացանկով պատկերացնող պոպուլիստներին բացատրում էինք, որ բանակը անձնական PR-ի գործիք չի կարելի դարձնել, կորուստների թվերը սեփական վարկանիշի բարձրացման միջոց չի կարելի դարձրել, ֆեյքերին քսի էին տալիս մեր վրա:
Իսկ այս խնդիրները խորքային ուսումնասիրության ու համակարգային լուծումների կարիք ունեն: Նորից եմ ասում՝ բանակում անհասկանալի հանգամանքներում կորուստների ցուցանիշի աճը վախեցնող է:
Սթափվեք»
