Վերադարձ դեպի Լուսին. ՆԱՍԱ-ն մարտից կսկսի լուսնային նոր առաքելության համար տիեզերագնացներ ընտրել
ԱՄՆ Օդագնացության և տիեզերական տարածության հետազոտությունների ազգային գործակալությունը (ՆԱՍԱ) այս տարվա մարտից կսկսի լուսնային նոր «Արտեմիս» առաքելության իրագործման նպատակով տիեզերագնացների ընտրության գործընթացը:
Ինչպես նշվում է գործակալության պաշտոնական կայքում, դիմումներն ընդունվելու են մարտի 2-31-ը: Այնուհետև ՆԱՍԱ-ի մասնագետները դիմորդների միջից կընտրեն հարմար թեկնածուներին, որպեսզի հետագա տարիներին նրանց նախապատրաստեն լուսնային առաքելությանը:
Ըստ գործակալության պահանջների՝ թեկնածուները պետք է լինեն ԱՄՆ քաղաքացի, ինժեներիայի, կենսաբանության, ֆիզիկայի, համակարգչային տեխնոլոգիաների, մաթեմատիկայի ոլորտներում ունենան բարձրագույն կրթություն, օդաչուական դպրոցի կամ էլ բժշկության բնագավառում ասպիրանտուրայի ավարտական դիպլոմ:
Կայքում նշվում է, որ եթե ամեն ինչ ըստ ծրագրի ընթանա, ապա տիեզերագնացները Լուսնի վրա վայրէջք կկատարեն արդեն 2024թ., ինչից հետո կտրվի մարդկանց Մարս մոլորակ ուղարկելու հավակնոտ ծրագրի նախապատրաստական աշխատանքների մեկնարկը: ՆԱՍԱ-ն Մարսի հետ կապված ծրագիրը մտադիր է իրականացնել 2030-ական թվականների կեսերին:
Ներկայում ՆԱՍԱ-ն ունի 48 տիեզերագնաց:
Հիշեցնենք, որ ավելի վաղ Միացյալ Նահանգների նախագահ Դոնալդ Թրամփը Կոնգրեսի Ներկայացուցիչների պալատի ամբիոնից կոչ էր արել ամբողջապես ֆինանսավորել ամերիկացի տիեզերագնացներին Լուսին ուղարկելու ծրագիրը:
Թրամփն ընդգծել էր, որ օրենսդիրները պետք է միշտ հիշեն ԱՄՆ-ի՝ առաջատար լինելու փաստն ու շարժվեն է՛լ ավելի առաջ՝ դեպի Լուսին:
«Խնդրում եմ Կոնգրեսին ամբողջապես ֆինանսավորել «Արտեմիս» ծրագիրը՝ երաշխավորելու համար, որ Լուսնի մակերևույթին վայրէջք կատարող հաջորդ կինն ու տղամարդն ամերիկացի տիեզերագնացներ են լինելու, և սա օգտագործելով որպես արձակման հարթակ՝ երաշխավորելու համար, որ Ամերիկան կլինի Մարսի վրա դրոշ ծածանած առաջին պետությունը»,-ասել է նախագահը:
