Փաշինյանը հայտարարել է՝ «Սասնա ծռերը» ահաբեկիչներ չեն. եթե մեր ընկերները շուտով ազատության մեջ չլինեն, կնշանակի, որ նա խաղը տանուլ է տվել․ «Սասնա ծռերը» բողոքի ակցիա էին կազմակերպել
Այսօր «Սասնա ծռեր» համահայկական շարժման անդամները բողոքի ակցիա էին կազմակերպել՝ փակելով Երևան-Գյումրի մայրուղին։ Ակցիայի մասնակիցների պահանջն էր ազատ արձակել «Սասնա ծռերի» անդամներ Արմեն Բիլյանին և Սմբատ Բարսեղյանին։
Ակցիան տեղի էր ունենում Շիրակի մարզի Արթիկ համայնքի մայրուղում, քանի որ անազատության մեջ գտնվող «Սասնա ծռեր» շարժման անդամ Սմբատ Բարսեղյանն այդ շրջանից է, և համայնքի բնակիչները ևս եկել էին աջակցելու։
Ակցիայի մասնակիցներից մեկը նշել է, որ Արմեն Բիլյանը և Սմբատ Բարսեղյանը հանցագործներ չեն․ «Նրանք իրացրել են ապստամբության բնական իրավունքը, որը յուրաքանչյուր քաղաքացու բարոյական իրավունքն է, ուստի ապստամբներն անպարտ են օրենքի առաջ և նրանք պետք է ազատ արձակվեն»,- ասել է նա։
Նրանցից մեկը հիշեցրել է, որ վարչապետ Նիկոլ Փաշինյանն արդեն հայտարարել է, որ «Սասնա ծռերը» ահաբեկիչներ չեն, սակայն մինչև այսօր նրանք անազատության մեջ են։ «Հեղափոխությունը շեղվել է իր իսկ բնականոն հունից։ Եթե «Սասնա ծռերը» շատ շուտով ազատության մեջ չլինեն, կնշանակի, որ պարոն Փաշինյանը խաղը տանուլ է տվել։ Պարոն Փաշինյա՛ն, հորդորում ենք, պահանջում ենք, սթափվի՛ր»։
Հիշեցնենք, որ այս պահին Երևանի ընդհանուր իրավասության դատարանի Շենգավիթի նստավայրում ընթանում է «Սասնա ծռերի» գործով դատական նիստը։
Մանրամասները՝ տեսանյութում
