Ռուսաստանում Չինաստանի նոր գլխավոր հյուպատոսը մեկուսացվել է, դիվանագետը երկու շաբաթ կարանտինային գոտում կմնա
Չինաստանի նոր գլխավոր հյուպատոս Ցոյ Շաոչունը պաշտոնական հանդիպումների անցկացման նպատակով ժամանել է Եկատերինբուրգ, սակայն երկշաբաթյա կարանտինի մեջ է հայտնվել: Դիվանագետը մեկուսացվել է, հայտնում է «Ինտերֆաքս»-ը ՝ հղում տալով Եկատերինբուրգում Ռուսաստանի արտաքին գործերի նախարարության ներկայացուցիչ Ալեքսանդր Խարլովին:
Գործակալության տվյալներով ՝ Շաոչունը Ռուսաստան է ժամանել փետրվարի 6-ին: Վերջինս ծրագրել էր մի շարք պաշտոնական հանդիպումներ անցկացնել, սակայն դրանք հետաձգվել են, քանի որ առաջիկա երկու շաբաթը դիվանագետը ստիպված կլինի տանն անցկացնել:
Հաղորդվում է նաև, որ փետրվարի 7-ին Եկատերինբուրգ ժամանած և «Բոդրոստ» («Бодрость») առողջարանի կարանտինային գոտում մնացած 58 չինացու ինքնազգացողությունը լավ է: Չինաստանի ևս 70 քաղաքացի Եկատերինբուրգի մերձակայքում գտնվող Բոգդանովիչ քաղաքի հանրակացարաններից մեկում է հյուրընկալվել: Բժիշկների խոսքով` մեկուսացման մեջ գտնվողներից որևէ մեկի մոտ վիրուս չի հայտնաբերվել:
