Միկրոավտոբուսային երթուղիների բնականոն աշխատանքը վերականգնվել է. Երևանի քաղաքապետարան
10 միկրոավտոբուսային երթուղիների բնականոն աշխատանքը վերականգնվել է: Այս մասին հայտնում են Երևանի քաղաքապետարանի աշխատակազմի
տեղեկատվության և հասարակայնության հետ կապերի վարչությունից:
Հիշեցնենք, որ այսօր մի քանի երթուղու վարորդներ բողոքի ակցիա էին կազմակերպել։ Մոտ 10 երթուղու 150 մեքենա դուրս չէր եկել երթուղի։ Վարորդները գործադուլն էին անում՝ պատճառաբանելով, որ ստացած գումարն իրենց կատարած աշխատանքին հավասար չէ, ըստ նրանց՝ տրանսպորտային միջոցը նախկինում ավելի ցածր գնով էին լիցքավորում գազով:
Երևանի քաղաքապետարանի մամուլի խոսնակ Հակոբ Կարապետյանը Tert.am-ի հետ զրույցում ասաց, որ վարորդները հրաժարվում են երթուղի դուրս գալ ուղևորափոխադրող ընկերության, այսինքն` իրենց գործատուի հետ անհամաձայնության պատճառով:
«Խոսքն օրական «պլանի» բարձրացման մասին է։ Հիմա քաղաքապետարանի ներկայացուցիչի մասնակցությամբ հարցը քննարկվում է։ Հասկանալի է, որ գործատուի և վարորդների խնդիրն է, բայց քաղաքապետարանը, բնականաբար շահագրգռված է, որ այդ հարցը արագ լուծվի, և երթուղայինների աշխատանքներն իրականացվեն»,- ասաց նա և հավելեց, որ վարորդները դեռ չեն աշխատում։
