Հնդկաստանում մանկահասակ աղջիկը հազվադեպ հիվանդության հետևանքով «քարացել» է (լուսանկարներ, տեսանյութ)
Հնդկաստանի Չհաթիսգարհ նահանգի Դանտեվադա շրջանից մանկահասակ աղջիկը հազվադեպ հանդիպող հիվանդության հետևանքով «քարացել» է, հայտնում է Daily Mail պարբերականը:
7-ամյա Ռաջեշվարին էպիդերմոլիտիկ իխթիոզ անբուժելի հիվանդությամբ է տառապում: Նրա ձեռքերը, ոտքերը և մեջքի մեծ մասը ծածկված է եղջերաթեփի նմանվող կոշտ բշտիկներով, որոնք քայլելիս և նստելիս ցավեցնում են աղջկան: Դանտեվադա շրջանում լավ հիվանդանոց չլինելու պատճառով երեխան հետազոտվելու համար ստիպված է լինում մեծ քաղաք գնալ:
Իխթիոզ հիվանդությունը վտանգավոր չէ առողջության համար, սակայն հիվանդը ստիպված է դրա ախտանշաններն ամբողջ կյանքի ընթացքում տանել: Ցածր քրտնարտադրության հետևանքով այս հիվանդությամբ տառապող մարդիկ հաճախ են ջերմային հարվածներ ստանում, իսկ ճաքերը նրանց ինֆեկցիոն հիվանդությունների համար խոցելի են դարձնում: Բացի այդ, նրանք սովորաբար թույլ տեսողություն և լսողություն ունեն:
Սովորաբար, իխթիոզը փոխանցվում է ծնողներից մեկից, սակայն այն կարող է նաև ձեռք բերվել առողջական խնդիրների հետևանքով: Իխթիոզով հիվանդները ստիպված են օրական մի քանի ժամ մաշկի խնամքին տրամադրել:
