Քասախցիները անցել են ռուսական պոստը ու հաջորդ պոստ չեն հասել, անհետացել են. շեղվելու տարբերակ չկար այդտեղ. Գորիսի փոխքաղաքապետ
Քասախի երկու բնակիչ երեկ գիշեր անհետացել են Գորիս Կապան ճանապարհին, անցել են ռուսական պոստը, որից հետո գալիս է ադրբեջանական պոստը, բայց հաջորդ պոստ էլ չեն հասել, անհետացել են:«Փաստինֆո»-ին այս մասին հայտնեց Գորիսի փոխքաղաքապետ Կարեն Քոչարյանը
Նշենք, որ ՀՀ ԱԱԾ-ի հաղորդմամբ՝ երեկ Քասախի երկու բնակիչ Գորիս-Որոտան ճանապարհահատվածով երթևեկելիս շեղվել են մայրուղուց և հայտնվել են Ադրբեջանի վերահսկողության տակ գտնվող տարածքում:
Գորիսի փոխքաղաքապետի տվյալներով՝ Քասախի բնակիչները հատել են ռուսական պոստը, սակայն հաջորդ պոստ այլևս չեն հասել, անհետացել են.
«Երեկ գիշեր մեր հայրենակիցներն են անհետացել Գորիս-Որոտան ճանապարհին, հայտնվել են ադրբեջանական կողմում: Ճանապարհի մի հատվածում ռուս խաղաղապահների պոստն է, այդ պոստն անցել են, հետո հաջորդը ադրբեջանական պոստն է, էլ հաջորդ պոստ չեն անցել, անհետացել են: Այդտեղ հատված չկա, որ շեղվեն, ճանապարհն ուղիղ գնում է: Ես չգիտեմ ԱԱԾ հաղորդագրության մեջ նշված է՝ շեղվել են, մտել հակառակորդի տարածք, այդ ճանապարհն անմիջապես հակառակորդի տարածքով էլ գնում է, շեղվելու տարբերակ չկա»,-ասաց Գորիսի փոխքաղաքապետը:
Նրա հաղորդմամբ՝ « ադրբեջանցիների այլանդակությունները և կոպտությունները շատանում են», մասնավորապես՝ երեկ ադրբեջանցին Գորիս-Կապան ավտոճանապարհին ոտքով հարվածել է հայկական համարանիշով մեքենային, այնուհետև անտենայով հարվածել է հայ վարորդին.
«Ադրբեջանցին ոտքով հարվածել է մեքենային, երբ հայ վարորդն ասել է՝ ի՞նչ ես անում, ռացիայի անտենայով խփել է վարորդին, ասել՝ ձայնդ կտրիր»,-ասաց Կարեն Քոչարյանը:
Փոխքաղաքապետը նաև նշեց, որ Գորիս-Կապան ճանապարհին ադրբեջանցիները շարունակում են իրանցի բեռնատարներ կանգնեցնել, գումար պահանջել, սակայն բեռնատարների կուտակումները նվազել են
«Ներկա պահին իրանական բեռնատարների կուտակումները նվազել են, իրանցի վարորդները կանգնում են, գումարը մուծում, անցնում են»,-ասաց նա
Կարեն Քոչարյանը նաև ընդգծեց, որ հայկական կողմի իշխանությունը որևէ քայլ չի անում խնդրին հանգուցալուծում տալու համար.
«Ղեկավարությունը չի մտածում, դուք որևէ քայլ նկատու՞մ եք որևէ քայլ, եթե քայլ արած լինեին, դուք էլ նկատած կլինեք»,-ասաց Գորիսի փոխքաղաքապետը:
