Ալիեւը խոստովանեց․ եթե նոյեմբերի 9-ը չլիներ, պատերազմն այլ ելք կունենար

Մոսկվան փոխել է ԵԱՀԿ Մինսկի խմբում իր համանախագահին ՝ այս պաշտոնում նշանակելով Իգոր Խովաևին: Նա արդեն հասցրել է Բաքվում հանդիպել ԱԳՆ ղեկավարի հետ: Նշվում է, որ այցը ճնաչողական է, կողմերը «մտքեր են փոխանակել նաեւ Ղարաբաղի վերաբերյալ եռակողմ հայտարարության դրույթների կատարման և վստահության ամրապնդման միջոցառումների վերաբերյալ»: Ռուսաստանից ԵԱՀԿ Մինսկի խմբի համանախագահը Բաքվի նախարարի հետ չի խոսել Մինսկի խմբի մասին, քանի որ Մոսկվան ու Բաքուն գտնում են, որ «եռակողմ հայտարարությունը» խնդրի կարգավորումն է:

Մոսկվան շարունակում է մնալ որպես Մինսկի խմբի համանախագահ՝ խմբի աշխատանքի վերսկսումը կանխելու համար: Հայաստանն ասում է, որ սպասում է ԵԱՀԿ Մինսկի խմբի առաջարկներին ՝ դրանով իսկ ընդունելով, որ մտադիր չէ իր կողմից նախաձեռնել գործընթացի վերսկսումը: Երևանը չի հայտարարում, որ նոյեմբերի 9-ի եռակողմ հայտարարությունը սպառվել է, նույնիսկ նշելով Բաքվի կողմից բազմաթիվ խախտումների մասին:

«Նոյեմբերի 10 -ի գիշերը Հայաստանը ստորագրել է կապիտուլյացիայի ակտ, և պատերազմն ավարտվել է: Մեզ համար պատերազմը դադարեցնելը ողջամիտ էր: Եթե ​​պատերազմը շարունակվեր, մենք ավելի շատ կորուստներ կունենայինք: Մենք կարող էինք դժվարությունների հանդիպել Քելբաջարի և Լաչինի շրջանների ազատագրման հարցում: Այս տարածաշրջանի կլիման, լեռները կարող էին խնդիր լինել մեզ համար: Առջևում ձմեռն էր», օրերս ասել է Ալիեւը:

Բաքուն չի թաքցնում, որ ունեցել է մեծ կորուստներ, և եթե չլիներ եռակողմ հայտարարությունը, որի «հայրությունը» ճանաչել է Պուտինը, պատերազմի ելքը կարող էր այլ լինել: Ներկայում խնդիրը պատերազմի արդյունքների ճանաչումն է։