Ստեղծվել է կորոնավիրուսը մի քանի վարկյանում ոչնչացնող կտոր
Ըստ «Известия»-ի՝ ռուս գիտնականները ստեղծել են նյութ, որն ունակ է մի քանի վարկյանում սպանել իր հետ փոխհարաբերության մեջ մտնող վիրուսներին: Նյութը կոչվում է «Իոնիտ», այն իրենից ներկայացնում է ոչ կտորե կառուցվածք ունեցող կտավ: Ի տարբերություն դիմակների և անձնական պաշտպանության համար նախատեսված այլ միջոցների, այն ոչ միայն թույլ չի տալիս վիրուսի մասնիկներին փոխանցվել, այլ ամբողջությամբ վնասազերծում է դրանք:
«Նյութի արտադրության ժամանակ մենք կառուցվածքում ավելացնում ենք նաև ակտիվ օրգանական մոլեկուլներ: Այդ մասերն ապաակտիվացնում, այսինքն՝ քայքայում են վիրուսներն ու բակտերիաները, երբ դրանք ընկնում են նյութի մակերևույքի վրա»,- ասել է նյութը մշակած կազմակերպության զարգացման գծով տնօրեն Մաքսիմ Յակովլևը: Վերջինիս խոսքերով, կորոնավիրուսը ոչնչացնող կտորը հուսալիորեն պաշտպանում է բակտերիաներից և վիրուսներից, միևնույն ժամանակ չի խանգարում շնչելուն:
Փորձարկումների ժամանակ պարզվել է, որ «Իոնիտ»-ը մի քանի վարկյանում ոչնչացրել է SARS-CoV-2-ը: Նշվում է, որ ռուս մասնագետները նպատակ ունեն այս կտորն օգտագործել տրանսպորտում, անձնական պաշտպանության միջոցների, փաթեթավորման, հագուստի և այլ ոլորտների արտադրության մեջ: Դեղատներում կտորի վաճառքը նախատեսված է սկսել 2021 թվականին: Այս պաշտպանիչ կտորով դիմակի նախնական գինը լինելու է 250 ռուբլի՝ մոտ 1800 ՀՀ դրամ:
