Բժիշկ Չարչյանին կալանավորած դատավորը ոստիկանության բարձրաստիճան պաշտոնյայի կինն է
«Իզմիրլյան» ԲԿ-ի ղեկավար, բժիշկ-վնասվածքաբան, պրոֆեսոր Արմեն Չարչյանին կալանավորելու վերաբերյալ որոշում կայացրած դատավոր Արմինե Մելիքսեթյանը Երևան քաղաքի առաջին ատյանի ընդհանուր իրավասության դատարանի դատավոր է նշանակվել 2019 թվականի նոյեմբերի 7-ին` Նիկոլ Փաշինյանի իշխանության օրոք։
Մինչ այդ նա ղեկավարել է ՀՀ ոստիկանության կրթահամալիրի Իրավաբանական կլինիկան: Կոռուպցիայի կանխարգելման հանձնաժողովի կայքում հրապարակված հայտարարագրի համաձայն՝ Մելիքսեթյանի ամուսինը՝ Հուսիկ Հովհաննիսյանը ոստիկանության Նաիրիր բաժնի պետի տեղակալն է։
Չնայած նրան, որ Մելիքսեթյանը համեմատաբար նոր է դատական համակարգում, նա արդեն հասցրել է հանրության ուշադրության կենտրոնում հայտնվել՝ մի շարք աղմկահարույց գործերով կայացնելով կալանավորման որոշումներ։
Մասնավորապես այս տարվա փետրվարի 21–ին Մելիքսեթայանի որոշմամբ կալանավորվել էր Ազգային ժողովի աշխատակազմի նախկին ղեկավար-գլխավոր քարտուղար Արա Սաղաթելյանը: Այս որոշումը սակայն երկու շաբաթ անց բեկանել էր Վերաքննիչ քրեական դատարանը և ազատ արձակել Արա Սաղաթելյանին։ Մելիքսեթայանը հանրությանը հայտնի է նաև ապրիլի 21-ին Սյունիքի մարզ վարչապետի այցելության ժամանակ տեղի ունեցած «խուլիգանության և իշխանության ներկայացուցիչների նկատմամբ բռնություն գործադրելու» գործերով մեղադրյալների նկատմամբ կայացրած կալանքի որոշումներով։
