«Ոչ մի քարտեզ, ոչ մի նախկին սահմաններ դեր չեն խաղում, այս անգրագետ իշխանությունը չգիտես ինչու ֆիքսվել է այդ քարտեզների վրա»
Հայաստանի տարածք ադրբեջանական զորքերի ներխուժման հարցով ՀԱՊԿ-ին, Ռուսաստանին կամ ՄԱԿ-ին դիմելու փոխարեն Հայաստանը պետք է քայլեր անի՝ թշնամուն երկրի տարածքից վտարելու ուղղությամբ։ Lragir.am-ի հետ զրույցում նման դիտարկում արեց սահմանադրագետ Վարդան Պողոսյանը։
«Եթե Հայաստանը որևէ քայլ չի ձեռնարկում, դրանից հետո դիմել ՄԱԿ-ին, ՀԱՊԿ-ին կամ Ռուսաստանին, դա պարզապես ծիծաղելի է։ Գողը եկել մտել է քո տունը, դու ոչ մի բան չես ձեռնարկում, ասում ես՝ հարևան, արի ինձ օգնիր։ Դա նշանակում է, որ մենք պետականությունը կորցնում ենք։ Մենք պետք է վտարենք մեր տարածքից, բա ինչի՞ համար են այդ զինված ուժերն ստեղծվել, ինչո՞ւ են հարկատուները փող վճարում, որ զինված ուժեր լինեն»,- ասաց Վարդան Պողոսյանը։
Անդրադառնալով սահմանազատման հարցերին՝ նա ասաց, որ այստեղ որևէ բարդություն չկա, սահմանը որպես կանոն որոշում են երկու պետությունները։ «Եվ այդտեղ ոչ մի քարտեզ, ոչ մի նախկին սահմաններ դեր չեն խաղում։ Պարզապես մեզ մոտ այս անգրագետ իշխանությունը չգիտես ինչու ֆիքսվել է այդ քարտեզների վրա կամ էլ խոսք է տվել, որ այդ քարտեզների հիման վրա է սահմանազատում անելու ու մեզ գցել է կրակը»,- ասաց նա։
Ըստ Վարդան Պողոսյանի՝ իսկ եթե այդ քարտեզներով նախանշած հատվածներից էլ են առաջ եկել ադրբեջանական զորքերը, դա նշանակում է, որ երկիրը չունի ղեկավարություն։ «Պետք է քայլեր անել, սրանք այնքան պարզ բաներ են, որ ոչ մասնագետ ցանկացած ոք հասկանում է»,- հավելեց նա։
