Գիտնականները մարդու պապիլոմավիրուսի եւս մեկ վտանգ են հայտնաբերել
Մարդու պապիլոմավիրուսը կարող է վարակված հղիների մոտ վաղաժամ ծննդաբերության հանգեցնել: Նման եզրակացության են եկել Հետեբորգի (Շվեդիա) համալսարանի գիտնականները, որոնց հետազոտության արդյունքները ներկայացվել են PLOS Medicine գիտական ամսագրում:
Ինչպես պատմում է MedicalXpress-ը, հետազոտության հեղինակները վերլուծել են 1999-2016 թվականներին գրանցված 1 044 023 ծնունդների մասին տվյալները: Ընդ որում, 23 185 կին անցել է բուժման կուրս, իսկ 11 275-ը պապիլոմավիրուսի սքրինինգային դրական թեստ է ունեցել հղիությունից առաջ եւ հղիության ժամանակ: Կանանցից, ովքեր ավելի վաղ բուժվել են արգանդի վզիկի դիսպլազիայից, 9,1 տոկոսը վաղաժամ է ծննդաբերել, իսկ ընթացիկ վարակով խմբում՝ 5,9 տոկոսը:
Գիտնականների խոսքով՝ չի կարելի անտեսել ՊԱՊ-թեստի մշտական հանձնումը արգանդի վզիկի ցանկացած փոփոխության ժամանակին հայտնաբերման համար: Ավելին, արդյունքները ցույց են տալիս, որ երիտասարդները պետք է մասնակցեն մարդու պապիլոմավիրուսի դեմ պատվաստման ծրագրին:
