ԳՇ պետի տեղակալն ասաց, թե որ դեպքում հայկական կողմը կոչնչացնի ադրբեջանցի զինծառայողներին
Արդյո՞ք քաղաքական ղեկավարությունից տեղում չկրակելու հրաման են տվել:
Այսօր մամուլի ասուլիսի ժամանակ ՀՀ ԶՈւ ԳՇ պետի տեղակալ Էդվարդ Ասրյանն ասաց, որ քաղաքական ղեկավարությունն այդպիսի հրամաններ չի տալիս, հրաման տալիս է ռազմական ղեկավարությունը, իսկ քաղաքական ղեկավարությունը որոշում է հանգուցալուծման համապատասխան ուղղություններ, պայմաններ. «Կրակել-չկրակելու հարցը քննարկում ու որոշում ենք մենք: Եթե մենք զգանք, որ արդեն իսկ չի կարելի հակառակորդի հետ ձեռնամարտի բռնվել ու լինեն համապատասխան նախանշաններ, նախապայմաններ, որ հակառակորդն արդեն իսկ ձգտում է այլ ուղղությամբ իր պայմանները թելադրել, մենք միանշանակ կկիրառենք ռազմական ուժ, զենք և կոչնչացնենք մեր տարածքում գտնվող հակառակորդի բոլոր զինծառայողներին:
Բոլորը գտնվում են նշանառման տակ: Նրանց զինծառայողները, վրանները, միջոցները տեսանելի են, թաքնված չեն, բոլորը գտնվում են նշանառության տակ: Զինված ուժերը պատրաստ են իրենց առաջ դրած խնդիրը կատարել»:
ԳՇ պետի տեղակալն ասաց, որ ներկա դրությամբ նման նախանշաններ չկան, եթե լինեն, ուժը կկիրառվի, հակառակորդը կոչնչացվի:
