ՌԴ ԱԳՆ-ն Արցախի ճանաչման հարցի առջեւ․ Մոսկվան ակնհայտորեն խճճվել է
Լեռնային Ղարաբաղի հիմնախնդրի քաղաքական կարգավորումը պետք է տեղի ունենա ԵԱՀԿ Մինսկի խմբի ձևաչափում, հայտարարել է Ռուսաստանի ԱԳՆ խոսնակ Մարիա Զախարովան, ընդգծելով, որ Մինսկի խմբի ձևաչափը միջազգային մեծ աջակցություն ունի: Զախարովան ասել է, որ Երևանի և Բաքվի միջև տարաձայնությունները, հատկապես Լեռնային Ղարաբաղի կարգավիճակի վերաբերյալ, շարունակում են առարկայական մնալ: Նա հիշեցրել է 2021 թվականի ապրիլի 13-ին համանախագահ երկրների հայտարարությունը, որում ընդգծվում էր «ղարաբաղյան հակամարտության վերջնական, համապարփակ և կայուն կարգավորման հասնելուն ուշադրություն դարձնելու անհրաժեշտությունը»:
Խոսելով Բաքվի զինվորականների Հայաստանի տարածք ներխուժելու մասին՝ ՌԴ ԱԳՆ ներկայացուցիչը հայտարարել է, որ «այդ միջադեպն անմիջական առնչություն չունի Լեռնային Ղարաբաղի խնդրի հետ: Մենք ելնում ենք այն հանգամանքից, որ նման հարցերը պետք է լուծվեն բացառապես խաղաղ, բանակցային ճանապարհով: Որպես երկարաժամկետ լուծում` տեսնում ենք հայ-ադրբեջանական սահմանի սահմանազատումը` դրան հաջորդող սահմանագծմամբ», ասել է Զախարովան:
Հետաքրքիր է, եթե Արցախի խնդիրը կապ չունի Հայաստանի տարածք ներխուժման եւ սահմանագծման հետ, ինչու է դա ներառված եռակողմ փաթեթում, եւ ինչու են Պուտինն ու Ալիեւը դրանք կապում միմյանց հետ, այն է՝ սահմանազատումը պետք է տեղի ունենա Արցախի կարգավիճակից հրաժարվելու եւ «Ադրբեջանի ամբողջությունը ճանաչելու» պայմանով։ Եթե կապ չունի, այդ դեպքում ինչո՞ւ չճանաչել Արցախը եւ այդպիսով ամբողջացնել «վերջնական ու համապարփակ լուծումը»։
Իսկ եթե Ղարաբաղի խնդիրն ու զինված ներխուժումը կապ չունեն միմյանց հետ, այդ դեպքում ինչո՞ւ ՀԱՊԿ-ը չի միջամտում եւ, ինչպես Նիկոլ Փաշինյանն է ասել՝ հորդորում է հայկական կողմին ուժ չկիրառել, փոխարենը՝ ռուսական այդ բլոկը կրկին հարցի լուծումը կապում է սահմանազատման հետ։
Մոսկվան ակնհայտորեն խճճվել է իր հակահայ եռակողմ կոչված նախաձեռնությունների եւ հայկական շահերի շուրջ միջազգային աննախադեպ աջակցության իրավիճակում, եւ այս հանգամանքը ավելի է խորանում։
