Մրսածության վիրուսը կարող է պաշտպանել COVID-19-ից․ հետազոտություն
Գլազգոյի համալսարանի գիտնականները նոր հետազոտության արդյունքում եկել են այն եզրահանգման, որ մրսածության (հարբուխ) հարուցիչ ռինովիրուսը կարող է պաշտպանել օրգանիզմը COVID-19-ի պատճառ հանդիսացող նոր կորոնավիրուսով վարակումից։ Շոտլանդացի գիտնականների նոր հետազոտության արդյունքները հրապարակվել են Journal of Infectious Diseases բրիտանական բժշկական ամսագրում։
Հետազոտության արդյունքում գիտնականները պարզել են, որ ռինովիրուսի հետևանքով առաջացած իմունային ռեակցիան թույլ չի տալիս կորոնավիրուսին վերարտադրվել օրգանիզմի բջիջներում։ Լաբորատոր պայմաններում շնչուղիները պատող բջիջներին նմանակող շերտի նմուշների վրա անցկացված գիտափորձերը ցույց են տվել, որ մարդու ռինովիրուսն առաջացնում է ինտերֆերոնային պատասխան, որն արգելակում է SARS-CoV-2-ի կրկնապատկումը (ռեպլիկացիա)։ Ընդ որում՝ նման արդյունք էր արձանագրվել և՛ այն դեպքում, երբ ռինովիրոսը նմուշի վրա էր հայտնվել կորոնավիրուսից 24 ժամ առաջ, և՛ այն դեպքում, երբ այն նմուշի վրա էր հայտնվել դրա՝ SARS-CoV-2-ով վարակվելուց մեկ օր անց։
Ինչպես ընդգծում են գիտնականները, մրսածությունից հետո ապաքինվելու դեպքում մարդը կրկին խոցելի է դառնում COVID-19-ի նկատմամբ, սակայն աշնան ու ձմռան ամիսներին ռինովիրուսի տարածումն այնուամենայնիվ կօգնի որոշ չափով դանդաղեցնել կորոնավիրուսային վարակի տարածման ընթացքը։
«Մաթեմատիկական սիմուլյացիան ցույց է տվել, որ տվյալ վիրուսների այս փոխգործակցությունը, ամենայն հավանականությամբ, կզգացվի ամբողջ բնակչության մասշտաբներով, և ռինովիրուսի տարածման ֆոնին COVID-19-ի նոր դեպքերի թիվը կնվազի», – ասված է հոդվածում:
Ինչպես BBC-ի հետ զրույցում նշել է հետազոտության համահեղինակ Պաբլո Մուրսիան, նմանատիպ արդյունք արդեն գրանցվել է 2009 թվականին, երբ ռինովիրուսներով պայմանավորված սուր շնչառական վիրուսային վարակների տարածման ֆոնին դանդաղել էր գրիպի H1N1 շտամով պայմանավորված հիվանդության՝ «խոզի գրիպի» տարածումը։
«Պատվաստումները, հիգիենայի կանոններին հետևելը, ինչպես նաև վիրուսների փոխգործակցության առանձնահատկությունները կարող են զգալիորեն նվազեցնել SARS-CoV-2-ի տարածման արագությունը, սակայն պատվաստումն այնուամենայնիվ ամենաարդյունավետ տարբերակը կլինի», – ընդգծել է Մուրսիան։
Մասնագետները հիշեցնում են, որ ռինովիրուսների վիրուլենտությունը չափազանց բարձր է, ուստի դրանք հաճախ են դառնում մրսածության զարգացման պատճառ։ Վարակման դեպքում հիվանդությունը որպես կանոն տևում է մոտ 10 օր։
