Կրկի՞ն առանց Մխիթարյանի. Կապառոսի ստեղծած հիմքի առանձնահատկությունը
Ֆուտբոլի Հայաստանի ազգային հավաքականը 2022 թվականի աշխարհի առաջնության ընտրական փուլը հնարավոր է սկսի առանց Հենրիխ Մխիթարյանի։ Մեր հավաքականի ավագը երեկ վնասվածք ստացավ Եվրոպա լիգայի խաղարկության 1/8-րդ եզրափակչի «Ռոմա»-«Շախտյոր» մրցավեճում։ Մասնավորապես, իր նախկին թիմի դեմ պայքարում մեր ֆուտբոլիստը փոխարինվեց 22-րդ րոպեին։ «Մխիթարյանի մասին: Միայն վաղը կունենանք ամբողջական պատկեր, բայց կարծում եմ՝ նա պատրաստ չի լինի հաջորդ խաղին»,- երեկ ասել էր «Ռոմայի» գլխավոր մարզիչ Ֆոնսեկան: Ըստ իտալական մամուլի՝ հայ ֆուտբոլիստը ազդրի մկանների հետ կապված խնդիր ունի։
Հիշեցնենք, որ մարտի վերջին Հայաստանի ազգային հավաքականը ընտրական փուլի շրջանակներում միանգամից երեք հանդիպում է անցկացնելու։ Մարտի 25-ին մեր ընտրանին կհյուրընկալվի Լիխտենշտեյնին, իսկ երեք օր անց Երևանում կհյուրընկալի Իսլանդիային։ Մարտին 31-ին կրկին Երևանում մերոնք կմրցեն Ռումինիայի հետ։
Հիշեցնենք, որ աշնանը տեղի ունեցած Ազգերի լիգայի խաղարկությունում, որտեղ Հայաստանի հավաքականը անցկացրել էր 6 հանդիպում, Մխիթարյանը մասնակցել էր միայն 2-ին։ Սեպտեմբերին տեղի ունեցած Հյուսիսային Մակեդոնիայի և Էստոնիայի դեմ մրցավեճերին Մխիթարյանը հավաքականին չէր միացել վատ մարզավիճակի պատճառով։ Վրաստանի և Հյուսիսային Մակեդոնիայի վերջին հանդիպումներն էլ մեր հավաքականի ավագը բաց թողեց՝ կորոնավիրուսի համավարակի պատճառով չկարողանալով միանալ իր ազգային թիմին։ Մխիթարյանը մասնակցել է Ազգերի լիգայի 3-րդ և 4-րդ տուրի Հայաստան-Վրաստան և Էստոնիա-Հայաստան հանդիպումներին։
Վերջին շրջանում մեր հավաքականի ավագը փայլուն խաղ էր ցուցադրում «Ռոմայի» կազմում, և հույս ունենք, որ նա արդյունավետությամբ աչքի կընկնի նաև մեր հավաքականի առաջիկա կարևոր հանդիպումներին։ Մինչև Վրաստանի հետ հանդիպումը, որին Մխիթարյանը մասնակցել էր, վերջին 6 հանդիպում Հայաստանի ազգային հավաքականը ևս անցկացրել էր առանց Հենրիխ Մխիթարյանի։ Մասնավորապես, ծանր վնասվածքի պատճառով մեր հավաքականի ավագը չէր մասնակցել 2020 թվականի Եվրոպայի առաջնության ընտրական փուլի՝ հոկտեմբերին և նոյեմբերին կայացած Լիխտենշտեյնի, Ֆինլանդիայի, Հունաստանի և Իտալիայի հավաքականների հետ հանդիպումներին։ Դրանից առաջ Հայաստանի ազգային հավաքականի մարզաշապիկը Մխիթարյանը կրել էր անցյալ տարվա սեպտեմբերին Բոսնիա-Հերցեգովինայի դեմ մրցավեճում։ Նրա փայլուն խաղի շնորհիվ մեր հավաքականը տպավորիչ հաղթանակ էր տարել 4։2 հաշվով՝ հնարավորություն ստանալով պայքարելու Եվրոպայի առաջնության եզրափակիչ փուլի ուղեգրի համար։ Լիխտենշտեյնի և Ֆինլանդիայի դեմ մրցավեճերում Հայաստանի հավաքականն առանց Մխիթարյանի տապալվեց։ Դրան հաջորդեցին Հունաստանի և Իտալիայի դեմ խայտառակ հանդիպումները։ Խայտառակ մրցավեճերից հետո շատերն այն կարծիքին էին, որ Հայաստանը ըստ էության ունի երկու տարբեր հավաքական. հավաքական՝ Հենրիխ Մխիթարյանով, և հավաքական՝ առանց Հենրիխ Մխիթարյանի։
Այո՛, տարիներ շարունակ բոլորս հույսներս դրել ենք Մխիթարյանի վրա՝ վստահ լինելով, որ նա, իր հետևից տանելով խաղընկերներին, կարող է հաղթանակներ կերտել։ Այո՛, շատ դեպքերում Մխիթարյանին հաջողվել է դա անել։ Ամենաթարմ օրինակը հենց Բոսնիայի հետ հանդիպումն է, բայց… Ազգերի լիգայի խաղարկությունում այն կարծրատիպը, որ Հայաստանի հավաքականը չի կարող լուրջ արդյունքի հասնել առանց իր ավագի, կարծես կոտրվեց։ Ազգերի լիգայի խաղարկությունում մեր հավաքականը երեք հաղթանակ տարավ և 9 միավոր վաստակեց առանց Մխիթարյանի։
Կարող ենք պնդել, որ իսպանացի մասնագետ Խոակին Կապառոսին հաջողվել է ստեղծել այն կոլեկտիվը, որը կարող է պայքարել նաև առանց ընդգծված առաջատարի։ Ավելի ստույգ, դավանելով թիմային ֆուտբոլ՝ Կապառոսը ստեղծել է հիմք, որտեղ, ինչ խոսք, մեծ է նաև առաջատարների դերը։
Առաջիկա հանդիպումներում կա հնարավորություն միավորների պաշար հավաքելու։ Մեր հավաքականը առաջին հանդիպումը կանցկացնի հետնապահի հետ, իսկ մյուս երկու մրցավեճերը՝ տանը։ Քանի դեռ Մխիթարյանի վնասվածքի վերաբերյալ ստույգ տեղեկություն չկա, մեզ մնում է միայն հուսալ, որ մրցաշարային առումով խիստ կարևոր հանդիպումներին մեր ֆուտբոլիստները կպայքարեն Մխիթարյանի գլխավորությամբ։ Հայ ֆուտբոլիստը բուժզննում պետք է անցներ այսօր։ Նշենք նաև, որ օրացուցային պլանի համաձայն՝ մինչև Հայաստանի հավաքականին միանալը Մխիթարյանը «Ռոմայում» պետք է անցկացնի երեք հանդիպում։
