Փաշինյանն ընտրության դեպքում 5 տոկոսի շեմը չի՛ հաղթահարելու. չի՛ գնա արտահերթի, որովհետև իր թիմին չի վստահում. Հովհաննես Սահակյան

Երեկ Նիկոլ Փաշինյանի հրաժարականը պահանջող քաղաքացիները բողոքի ակցիա իրականացրեցին Կառավարության շենքի դիմաց, որտեղ իրավիճակը կտրուկ լարվեց այն ժամանակ, երբ Փաշինյանի աշխատասենյակի պատուհանի տակ «թուրք» վանկարկող քաղաքացիները փորձեցին ճեղքել ոստիկանական մի քանի շերտ ունեցող պատն ու մտնել Կառավարության շենք, ինչը չհաջողվեց: Դրանից հետո ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում քրեական գործ հարուցվեց ՀՀ կառավարության շենքը զավթելու փորձ կատարելու առիթով և ձերբակալվեց ակցիայի մասնակից հինգ մարդ։

168 TV-ի «Ռեվյու» հաղորդաշարի եթերում, անդրադառնալով երեկվա իրադարձություններին ու դրանք համեմատելով 2018 թվականի ապրիլյան դեպքերի հետ, ՀՀԿ խորհրդի անդամ Հովհաննես Սահակյանը նշեց.

«Այսօր այն, ինչ տեղի է ունենում Հայաստանում, եթե տեղի ունենար, օրինակ, 2005 թվականին կամ մինչև 2017 թվականը, պատճառ կդառնար, որ եվրոպական կառույցները Հայաստանին զրկեին ամեն ինչից։ Լուրջ դեմքերով եվրոպացի պաշտոնյաները մեզ կզրկեին ամեն ինչից՝ իրենց պատժամիջոցներով, ու Հայաստանը կհամարեին ոչ ժողովրդավար երկիր, իսկ այսօր այդ նույն եվրոպացի պաշտոնյաներն աչք են փակում ոչ միայն Արցախում ֆոսֆորային և կասետային ռումբերի օգտագործման դեմ, այլ նաև երկրի ներսում ոստիկանների կողմից բիրտ ուժի կիրառման դեմ։ Այսօր մենք տեսնում ենք, թե ոստիկաններն ինչպե՞ս են վերաբերվում ոչ միայն կանանց և աղջիկների հետ ցույցերի վայրում, այլ նաև հայ ժողովրդի հպարտությունը համարվող մարդկանց հետ՝ օրինակ, Իսրայել Հակոբկոխյանի։ Այս ամենից հետո էլ շարունակում են ժպիտով հարցազրույցներ տալ, այնպես որ, երկրում ստեղծվել է մի իրավիճակ, որ իշխանությունը գետնին է գցած պարզապես»,- ասաց Հովհաննես Սահակյանը։

Թե ինչո՞ւ այդ դեպքում ընդդիմությունը չի կարողանում վերցնել գետնին գցած իշխանությունը, Հովհաննես Սահակյանը պատասխանեց.

«Ընդդիմությունը փորձում է քաղաքակիրթ և սահմանադրական ճանապարհով ստիպել, որ իշխանությունը գնա։ Սահմանադրությամբ կա արտահերթ ընտրություն անցկացնելու ընդամենը մեկ ելք՝ որպեսզի խորհրդարանը երկու անգամ վարչապետ չընտրի։ Ընդդիմությունն այս ճանապարհով է գնում՝ կրկնում եմ՝ մնալով Սահմանադրության շրջանակներում՝ հույս ունենալով, որ մարդը, որը պարտվել է, պետք է հեռանա, ինչպես, օրինակ, տեղի է ունենում սպորտում»։

Արդյո՞ք Նիկոլ Փաշինյանը Սահմանադրական ճանապարհով է եկել իշխանության 2018 թվականին, կամ արդյո՞ք ընդամենը եռակողմ հայտարարությամբ խորհրդարանական երկիրը համաձայնություն կարող էր տալ Արցախի 9 շրջանի հանձնմանը Ադրբեջանին, և արդյո՞ք այս գործընթացը տեղավորվում է ընդդիմության մատնանշած Սահմանադրության մեջ, Հովհաննես Սահակյանը պատասխանեց՝ այն որ եղել է դավաճանություն, կասկած չունի։

«Մութ պատմությունները շատ են։ Դրանք կարող են բացահայտել արդեն հաջորդ իշխանությունները, իսկ ընդդիմությունը հիմա շարունակում է գնալ սահմանադրական ճանապարհով։ Մյուս կողմից, որքան էլ այս իշխանությունը հետաձգի իր հրաժարականը, այնքան վաստակելու է ժողովրդի զայրույթը, ինչը վտանգավոր է։ Մենք հասկանում եք, թե ի՞նչ է կատարվում, եթե այս իշխանությունը չի հեռանում, որովհետև մեր երկրի անվտանգությունը հասցրել է մինուս անվերջության, երկրի քաղաքացու անվտանգությունը երաշխավորված չէ, և ամեն մեկն իր անվտանգության մասին մտածելով՝ այսօր հեռանում է Հայաստանից՝ ընտանիքով։ Այսօր Շուշիում «Գորշ գայլեր» խմբավորումը հատուկ դպրոց է կառուցում, իսկ Շուշիից հայկական պետհամարանիշով մեքենայով Երևան գալն ընդամենը տեխնիկայի խնդիր է»,- ասաց Սահակյանը։

Ինչ վերաբերում է արտահերթ ընտրություններ անցկացնելու՝ իշխանության պատրաստակամությանը, ապա Հովհաննես Սահակյանը դա համարեց ընդամենը կեղծ օրակարգ։

«Փաշինյանի գլխավորությամբ օրվա իշխանությունը չի պատրաստվում գնալ արտահերթ ընտրության, իսկ դրա մասին շատ են խոսում, որպեսզի օրակարգը լրացնեն։ Փաշինյանը վստահ է՝ ընտրության դեպքում 5 տոկոսի շեմը չի հաղթահարելու, հետևաբար՝ մանիպուլյացիաներով փորձում է օրակարգ լցնել։ Եթե նա իր թիմին չի վստահում, ինչի համար էլ հրաժարական չի տալիս, այդ ինչպե՞ս է գնալու արտահերթ ընտրության»,- ասաց նա։

Հարցազրույցի մանրամասները՝ տեսանյութում