ՀՀ անվտանգությանն անհրաժեշտ է լայն քաղաքական կոնսենսուս, դրան հասնելու միակ ուղին Փաշինյանի հրաժարականն է․ «Միասնություն» շարժում
Հայաստանում հասունացած քաղաքական ճգնաժամն ու անիշխանությունն առկա ծանր շրջանում ավելի են խորացնում մեր պետականության առջև ծառացած խնդիրները։ ՀՀ անվտանգության համար այսօր անհրաժեշտ է լայն քաղաքական կոնսենսուս, իսկ դրան հասնելու միակ ուղին Նիկոլ Փաշինյանի հրաժարականն է, ժամանակավոր կառավարության ձևավորումը և ամենասեղմ ժամկետներում խորհրդարանական ընտրությունների կազմակերպումը։
Հանրահավաքների, ակցիաների, միտինգների, նստացույցերի լեզվով Նիկոլ Փաշինյանի հետ խոսելը բարդ է․ նա տարիներ շարունակ կոփվել է այդ հարցում, և դա, թերևս, պայքարի ամենադժվար մեթոդն է նրա դեմ կիրառելու համար։
«Միասնություն» շարժումը ևս մեկ անգամ հորդորում է Նիկոլ Փաշինյանին` ճիշտ գնահատել երկրում ստեղծված իրավիճակը, գոնե մեկ անգամ դրսևորել հայրենասիրություն և արժանապատիվ կերպով հեռանալ՝ շանս տալով անցկացնելու արտահերթ խորհրդարանական ընտրություններ։
Միևնույն ժամանակ, հանրության գիտակցության մեջ պետք է ամրացնել կարևոր մի հանգամանք՝ մեզ պետք են ազգային արժեքներ կրող, նոր ու պրոֆեսիոնալ մարդիկ, որոնք երբևէ կոռումպացված օղակների մաս չեն կազմել։
Միայն պրոֆեսիոնալ կադրերով ձևավորված իշխանությունը կարող է լուծել Հայաստանի Հանրապետության առջև ծառացած լրջագույն խնդիրները։
«Միասնություն» շարժում
