Մոսկվա-Բաքու. տարածք գերիների դիմաց, որն է հաջորդը
Հադրութի շրջանի գյուղերի հանձնումը Բաքվին տեղի ունեցավ հայ գերիների վերադարձի օրը: Թուրքերի հարձակումներին հայկական կողմի եռօրյա դիմադրությունից հետո այդ գյուղերում հայտնվել են ռուս խաղաղապահները, որից հետո էլ որոշում է կայացվել հանձնել այդ գյուղերը: Դրա մասին ակնարկել էր Դմիտրի Պեսկովը, ասելով, որ Հադրութում հրադադարի խախտումը լրացուցիչ բեռ է ռուս խաղաղապահների համար: Իսկ Կրեմլի փորձագետներից մեկն էլ ասել է, որ այդ գյուղերը «մնացուկ» էին, միեւնույն է՝ Հադրութի շրջանը Բաքվի վերահսկողության տակ է:
Հայաստանում արդեն կարծիքներ են հնչում, որ տեղի է ունեցել գերիներ տարածքների դիմաց գործարք: Ըստ տեղեկությունների, դա էլ տեղի է ունեցել, ինչպես ռուսներն են հայտարարում՝ բոլորի բոլորի դիմաց սկզբունքով: Սակայն այս սկզբունքն էլ չի գործել, որովհետեւ ոչ բոլոր հայ գերիներն են ազատ արձակվել: Ընդ որում, հայկական կողմը մինչ տարածքները զիջել է նաեւ երկու դիվերսանտ-մարդասպաններին, թեեւ, ինչպես Արփինե Հովհաննիսյանն է ասում, դրանց պետք էր հանձնել ամենավերջում, վերջին հայ գերու վերադարձի հետ:
Եռակողմ հայտարարությունը չի գործում, ավելի ճիշտ՝ հերթական անգամ ապացուցվում է, որ այն ռուս-թուրքական համաձայնություն է ընդդեմ Հայաստանի: Գերիները ըստ այդ փաստաթղթի պետք է վերադարձվեն առանց նախապայմանների, սակայն այդ հայտարարության ցանկացած դրույթ հայկական կողմի հանդեպ գործում եւ գործելու է լրացուցիչ պայմաններով: Ըստ ամենայնի՝ գերիների մի մասին էլ կվերադարձնեն Շուշիի հայկական երկու գյուղերը տեղահանելուց ու հանձնելուց հետո: Եվ այդպես շարունակ՝ կվերցնեն նոր գերիներ, ու թե թուրքերը կստանան իրենց ուզածը, թե ռուսները կազատվեն «լրացուցիչ բեռից»:
Ավելին՝ այստեղ
