ԻՆՉՊԵ՞Ս Է 3 ՀԱԶԱՐ ՈՒՍՈՒՑԻՉ ՄԻՆՉԵՒ ՍԵՊՏԵՄԲԵՐԻ 15-Ը ԹԵՍՏԱՎՈՐՈՒՄ ԱՆՑՆԵԼՈՒ
Ինչպես տեղեկացանք օրերս ԿԳՄՍ-ի հրապարակած ուղեցույցից, ԿԳՄՍ-ն մինչև սեպտեմբերի 15-ը, այսինքն՝ հանրակրթության բոլոր մակարդակներում (տարրական, միջին և ավագ) մեկնարկող ուսումնական տարվա մեկնարկը, պետք է անցկացնի (իսկ 1-ին դասարանցիները դպրոց են հաճախում սեպտեմբերի 14-ին` մեկ անձի ուղեկցությամբ) ուսուցիչների թեստավորում։
Հայաստանում կա 30 հազար ուսուցիչ, իսկ Հայաստանում ՊՇՌ թեստերի «պատմական մինիմումն» օրական 2000 է։ Այսինքն, այն, որ կհասցնեն, մի քիչ ֆանտաստիկայի ժանրից է հնչում, որովհետև ստացվում է, որ ողջ հանրապետությունով մեկ միայն ուսուցիչների թեստերով պետք է զբաղվեն, ու անգամ այդ դեպքում քիչ հավանական է, որ բոլորին կհասցնեն թեստավորել։ Նշված հարցադրումն ուղղեցինք նախ առողջապահության նախարարության հասարակայնության հետ կապերի բաժնի պետ Լիլիթ Բաբախանյանին, որն ասաց․ «Հանրապետությունում ունենք շուրջ 30 հազար ուսուցիչ: Նախևառաջ պետք է հասկանալ, թե նրանցից քանի տոկոսն է առկա ուսուցմամբ դպրոց հաճախելու: Այդ նպատակով ուսուցիչների տվյալները հավաքագրելու համար մարզպետարաններ, գյուղապետարաններ ու քաղաքապետարաններ գրություններ են ուղարկվել: Այնուհետև ուսուցիչներին տարածքային պոլիկլինիկաներում կտրամադրվի թերթիկ, որով կհաստատվի, որ տվյալ ուսուցիչն առկա ուսուցմամբ դպրոց է հաճախում։ Այս պահին այդ տեղեկատվության հավաքագրման գործընթացն է, որից հետո պարզ կլինեն ժամկետները»։
Այդուհանդերձ, ինչպես հայտնեց ԿԳՄՍ նախարարության հասարակայնության հետ կապերի վարչության պետի տեղակալ Օֆելյա Կամավոսյանը, թեստավորումը նախատեսված է բոլոր ուսուցիչների համար, ոչ միայն առկա ուսուցմամբ։ Սակայն այն մանկավարժների համար, որոնք կայացրել են հեռավար ուսուցում կայացնելու որոշում, կարող են սեփական հայեցողությամբ թեստավորում չանցնել։ Չկա թեստավորում անցնելու հարկադրանք։
«Չէ՞ որ մենք նաև նշել էինք, որ այն անձինք, որոնց առողջությունը վտանգված է, իրենք կարող են դիմումներ ներկայացնել դպրոց և կարող են նաև չթեստավորվել»։ Ընդգծվեց, որ թեստավորում անցնելուց կարող են հրաժարվել միայն հեռավար ուսուցում անցկացնող ուսուցիչները։
Ինչպես հաղորդել էր «Ռեգնում» գործակալությունը, Ռուսաստանում օգոստոսի 20-ից մինչև սեպտեմբերի 1-ը բոլոր ուսուցիչներն անցնում են կորոնավիրուսի հակամարմինների հետազոտություն։ Հարցին, թե Հայաստանում ուսուցիչների համար անցկացվելու է միայն ՊՇՌ, թե՞ նաև հակամարմինների ուսումնասիրություն, ԱՆ հասարակայնության հետ կապերի բաժնի ղեկավարը նշեց՝ միայն ՊՇՌ:
