Թուրքիան Սիրիայից գրոհայինների է պատրաստվում ուղարկել Ադրբեջան
Թուրքիան առաջիկա օրերին պատրաստվում է սիրիական ընդդիմության մաս կազմող Սիրիայի ազատ բանակի զինված խմբավորումների գրոհայինների ուղարկել Ադրբեջան՝ Հայաստանի դեմ ռազմական գործողություններում ադրբեջանական բանակին աջակցելու նպատակով, ТАCC-ի փոխանցմամբ՝ հաղորդում է քրդական Firat լրատվական գործակալությունը:
Ըստ աղբյուրի տվյալների՝ այդ նպատակով սիրիական Ջենջերիս, Ռաջու և Աֆրին քաղաքներում վարձկանների հավաքագրման կետեր են բացվել: Գրոհայինների հետ 6 ամիս ժամկետով է պայմանագիր կնքվելու՝ երկարաձգելու հեռանկարով, իսկ վարձատրությունն ամսական կկազմի 3500 դոլար:
Թե որքան գրոհայիններ կգործուղվեն Ադրբեջան, այս պահին հայտնի չէ:
Այսպիսի տեղեկատվություն է հրապարակել նաև սիրիական Sham FM ռադիոկայանը:
Հիշեցնենք, որ հուլիսի 12-ին Հայաստանի Հանրապետության Տավուշի մարզի ուղղությամբ ադրբեջանական զինված ուժերի ձեռնարկած հարձակումից հետո Թուրքիայի ղեկավարությունը՝ այդ թվում նախագահը, արտաքին գործերի և պաշտպանության նախարարները, հանդես են եկել մի շարք պաշտոնական հայտարարություններով՝ լիակատար աջակցություն հայտնելով Ադրբեջանի ձեռնարկած հարձակողական գործողություններին ու հանդես գալով ռազմական օգնություն ցուցաբերելու պատրաստակամությամբ:
