Երասխում պետական տարբեր ծրագրերով իրականացվում են շինարարական մեծածավալ աշխատանքներ
Արարատի մարզի Երասխ համայնքում ՀՀ կառավարության և համայնքի համաֆինանսավորմամբ իրականացվում է երկու սուբվենցիոն ծրագիր` համայնքի կենտրոնական փողոցի ասֆալտապատման և ջրահեռացման համակարգի կառուցում, Մայիսյան փողոցի կոպճապատում և ջրահեռացման համակարգի կառուցում:
Այս մասին «Ֆեյսբուք»-ի իր էջում գրել է Արարատի մարզպետ Գարիկ Սարգսյանը:
«Մայիսյան փողոցի կոպճապատման և ջրահեռացման համակարգի կառուցման աշխատանքներն արդեն ավարտվել են: Այս պահին շարունակվում է համայնքի կենտրոնական փողոցի ասֆալտապատումն ու ջրահեռացման համակարգի կառուցումը: Բուռն ընթացքի մեջ է նաև Կառավարության ֆինանսավորմամբ ամիսներ առաջ մեկնարկած Պարույր Սևակ գյուղի Տիգրանաշեն թաղամասից մինչև Երասխի օղակաձև հրապարակ իրականացվող 12 կմ երկարությամբ ճանապարհի կապիտալ վերանորոգումը: Շինարարությունն իրականացնող «AAB Construction» ընկերությունն անում է ամեն հնարավորը ՝ սահմանված ժամկետում՝ դեկտեմբերին, ճանապարհը շահագործման հանձնելու ուղղությամբ:
Երասխում ճանապարհաշինական աշխատանքներին զուգահեռ Տարածքային զարգացման հիմնադրամի և համայնքապետարանի 10% համաֆինանսավորմամբ վերակառուցվում է դպրոցի չշահագործվող մասնաշենքը, որի առաջին հարկում կտեղակայվի համայնքի մանկապարտեզը, երկրորդ հարկը կտրամադրվի դպրոցին: Մանկապարտեզում գործելու է երկու խումբ: Մինչ այժմ Երասխի երեխաները հաճախում են հարակից համայնքների կրթօջախներ: Դպրոցի այս մասնաշենքը նախատեսված է շահագործման հանձնել հաջորդ տարի»,- գրել է Սարգսյանը:
